Pengawa nasih tanah Jematan Batang Lupar 23 March tu

KUCHING: Kepala Menteri Datuk Patinggi Abang Johari Tun Openg deka bejadika pengawa nasih tanah Jematan Batang Lupar, Sebuyau kena Hari Dua (23 March) tu.

Bepelasarka berita ari Unit Komunikasyen Perintah Sarawak (UKAS), Abang Johari dipelaba datai ba taba projek nya urung pukul 10.30 pagi lalu Jematan Batang Lupar tu dipelaba urung 1.5 kilometer penyah ari pengkalan feri Sebuyau.

Beduduk ari nya, staf Opis Pelilih Mit Sebuyau udah bejalaika inisiatif beripai meresi kandang endur Dewan Pembangunan Sebuyau kena Hari Tiga tu tadi.

Pia mega ungkup pengelikun, penatai mensia mayuh ditatak lalu pengawa nya ulih dipeda terus ari Facebook enggau Youtube UKAS.

Dulu ari tu, Suara Sarawak bisi mantaika berita pengerami tu deka diatur kena 18 Februari tu tadi, tang ditangguh dikena nagang pengerekai Covid-19.

Pia mega kena 10 Januari ke udah, Menteri Muda Infrastruktur enggau Penyangkai Kapal Datuk Julaihi Narawi bisi madah, projek jematan nya beungkus RM848 juta lalu dipelaba tembu 2025.

Jematan ke ngembuan 5.1 kilometer pemanjai ngelayang nanga Batang Lupar terus ke Triso nya enti udah tembu jemah deka nyadi jematan ke pemadu panjai ba Sarawak ngalahka rikod pemanjai Jematan Batang Sadong.

Tu endang sebagi ari projek penyambung Jalai Tebing Pantai enggau bungkur Jalai Besai Kedua ke beungkus RM11 billion digaga Perintah Sarawak.

Ungkup penemu, entara semilan buah jematan deka digaga ba Sarawak iya nya Jematan Batang Rambungan, Jematan Batang Lupar, Jematan Sungai Krian, Jematan Batang Igan, Jematan Batang Rajang, Jematan Saribas, Jematan Batang Paloh, Jematan Muara Lassa, Jematan Sungai Sejingkat enggau Jematan Jepak.

Projek ngaga Jematan Batang Lupar endang sebengkah ari jalai penyambung ke chukup beguna dikena besambungka jalai tebing pantai sereta nyungkak pemansang ba menua pesisir.

Tu mega entara tiga projek ngaga jematan ba Sarawak ke udah dikinsil Perintah Pakatan Harapan, tang ketegal beratika perengka guna rayat, Perintah Sarawak ngaga pemutus nanggung ungkus ngaga jematan nya.

Suara Sarawak