MARUDI: Beserimbai Pengerami Gawai Dayak 2023, Sapit Menteri Pengerai, Pengawa Berumah enggau Perintah Lokal begulai enggau bini sereta bala bukai udah ngabang Gawai ba sekeda rumah panjai di Ulu Teru.
Entara rumah panjai dilawa Kaban Kunsil Nengeri (ADUN) Marudi iya nya Rumah Pemanca Enggah (Rumah Bunda), Rumah Henry Gomes, Rumah Penghulu Kalang (Rumah Abok), Rumah Kalong, Rumah Rendah, Rumah Takang enggau Rumah Enggie.
Tuju pengawa ngabang tu dikena ngedut pemanah kaul enggau rayat sereta peranak rumah panjai.
“Terima kasih ke pemanah basa semua rumah panjai ti udah endur kami ngabang, chukup rami lebuh kami datai nandang ngabang.
“Berasai teperindang enggau gaga ulih berami seraya ngerapit kaul enggau rayat ba rumah panjai di Ulu Teru ditu,” ku Penguang.
Iya mega madah, Pengerami Gawai Dayak taun tu chukup richah laban mayuh bala pulai berami, bebuti enggau betundi enggau pangan diri.
“Nyangka bedau laun aku meri Selamat Ngintu Gawai Dayak ari kami sebilik.
“Kami besampi semua kitai betuchung baka bukit, ngebung baka langit, gayu guru, gerai nyamai nguan menua, bulih duit bulih ringgit, nadai apa nadai nama.
“Arap ke taun baru tu mai pengering enggau penyerakup, nadai ngira raban bansa enggau jalai pengarap kelebih agi ba sitak Marudi,” ku sampi Penguang.
