KUCHING: Leka jaku ‘Segulai Sejalai’ mujur dipilih Menteri Besai, Datuk Seri Anwar Ibrahim nyadi rambai jaku penyerakup ba selampur menua.
Pekara nya dikena ngemujur inisiatif iya ngempung rayat Malaysia ti bebida bansa, jalai pengarap enggau asal penatai.
Menteri Dagang Temuai, Industri Kreatif enggau Seni Pemerindang (MTCP), Datuk Seri Abdul Karim Rahman Hamzah madah, nya sebengkah basa ungkup Sarawak laban ‘Segulai Sejalai’ mai reti ti besai bekaul penyerakup.
“Begulai sejalai narak penyerakup sebengkah insiatif ti benung dipejalaika iya (Anwar) dikena ngempung semua rayat Malaysia,” ku iya.
Karim mansutka jaku nya rambau dirandau pemberita pengudah Pengerami Raya Ngiling Bidai Gawai Dayak Komiti Besai Servis Perintah Nengeri Sarawak (SPANS) 2023 ditu, malam kemari.
Iya madah, bemacham isu bekaul jalai pengarap enggau bansa nyadi ketegal politik ti ngembuan sekeda penemu ti tekelalu iga tang Anwar meda semua pekara ti nyadi ba menua bukai nya enda nyadi ba Sarawak.
“Anwar meda rayat Sarawak ti bemacham pupu bansa enggau jalai pengarap idup beserakup sereta bebasaka pangan diri.
“Dipelaba aku, tu meh kebuah Menteri Besai ngena leka jaku ‘Segulai Sejalai’ ti suah disebut kitai ba sebarang endur kitai ngintu Gawai nyadi rambai jaku penyerakup.
“Aku meda tu nyadi siti basa ti besai ngagai Sarawak taja pen tu jaku Iban tang semua pupu bansa ba menua tu nemu reti jaku tu,” ku iya.
