Pengawa ningkilka Baru Bian puntan

MIRI: Pengawa nguji ningkilka Baru Bian nyadi chairman Parti Keadilan Rakyat (PKR) Sarawak nengah Konvensyen Keadilan Sarawak kemari puntan, kenu ku penerang ari dalam parti nya.

“Surat Sumpah Sempekat sida udah bisi tang nadai diguna,” ku iya.

Tim ti ngelaban Baru nya mega dipadahka asa lebuh Presiden PKR Datuk Seri Anwar Ibrahim ti bejadika konvensyen nadai ngatur aum begulai enggau sida udah nya.

Kebuah pia laban Anwar berumban pulai ngagai Kuala Lumpur laban deka ngulu aum Pakatan Harapan (PH) begulai enggau Menteri Besai Tun Dr Mahathir Mohamad urung pukul 3 lemai.

Tang jaku pesan chukup terang dikenataika Anwar ngagai lebih 1,000 deligit ke datai minta sida fokus ngagai Pengawa Bepilih Besai Nengeri Ke-12 (PRN12) ke deka diatur enda lama agi.

Berebak enggau nya, Kaban Parlimen Miri ke mega Ketuai Pampang PKR Miri Dr Michael Teo nguji ngelimpang lebuh ditanya pasal mosyen deka nendang Baru ari Chairman PKR Sarawak nengah konvensyen nya.

Tang iya maya dirandau pengudah konvensyen madah enggai betalat penemu enggau Kaunsil Ketuai Nengeri (MPN) Sarawak pasal kuasa ngaga pemutus nyengkaum dalam PKR Sarawak.

“Piak MPN Sarawak suah madah sida bekuasa ngatur konvensyen tu, tang kebendar nya enda betul laban kuasa bepanggai ba presiden (Anwar),” ku iya.

Nya alai, iya madah MPN Sarawak nadai nitihka atur parti.

Suara Sarawak