Pengawa nipak tuju serakup ditumbuh

Serakup Ngasi Sarawak

KUCHING: Setipak enggau siti ari juluk Serakup Ngajat Asal Iban (Ngasi) Sarawak deka ngangkatka pekara rama, seni enggau main asal nengah kaul aktiviti enggau latih.

Kenu ku Presiden Serakup Ngasi Sarawak, Ajat Sumoh, bala kaban serakup endang diperansang ngaul diri ba semua aktiviti enggau program nyengkaum latih beraban ti diatur serakup nya.

“Kitai endang meransang bala menyadi ti begempung di baruh serakup tu chakah ngaul diri, enti ulih ba semua aktiviti enggau program sereta latih.

“Tu nentuka sida nerima pemaik enggau penguntung ari semua atur aktiviti tu dikena nambahka penemu, ngansah penau enggau pengelandik sereta nyikap diri ngena penemu baru,” ku Ajat nerang.

CHUKUP LUMAI… Bala kaban Biro Indu ngajar chara ngelumai tepung dikena ngaga chuan ngagai rebak baru.

Nya alai ku Ajat, pengeregas Biro Indu serakup nya ngatur macham aktiviti ungkup kaban sida endang dipuji sereta disukung tegut, ditambah enggau pengelanchat ngatur pengawa ngasuh kitai ransing agi nyukung sida.

“Kitai temegah meda penyikar sida ke indu ngatur kelas enggau bengkel ngaul pengawa rama ti mega ngaul rebak baru.

“Tu nyengkaum bengkel ngaga kuih tradisi, nengkebang barang ari leka manik enggau nyumai.

“Lalu bala kaban Biro Indu kitai mega udah merambu deka ngatur Bengkel Berapi kena 14 September, dientudi Bengkel Beranyam kena 13 Oktober enggau Bengkel Ngaga Barang Ari Manik kena 24 November, sekeda ari aktiviti ungkup taun tu,” ku Ajat ngelansa silik.

Nangkan nya ku Ajat, Biro Indu Serakup Ngasi Sarawak mega udah mujur ngatur bengkel ngaga kuih chuan enggau nguring kachang ngambika dijual dikena ngulihka belanja ungkup serakup.

NAMPUNG PENEMU… Bala nembiak diajar chara nyumai chuan.

Kelimpah ari nya ku Ajat, sida mega diperansang nyereta pengawa mantaika main asal enggau pekit main asal sereta seni ti seruran diatur nyerumba pengerami sekalika diatur serakup nya tauka serakup bukai.

“Kitai mega bisi pengandal bala kaban ti mungkal serakup tu bepenau nyadi pengajar, fasilatator, pengatur pengawa, ngemuntangka pengawa, pengatur enggau ngemujurka pejalai aktiviti tauka program.

“Tu setipak enggau tuju kitai numbuhka serakup bepelasarka autonomi mensia ke alai bala kaban begempung chara volunteer dikena nyapai batang tuju enggau juluk begulai ba pekara seni, main asal, pekara rama enggau ekonomi nengah sebengkah gerempung ti dipenggi begulai enggau dipatau chara demokrasyen,” ku Ajat madah nyemetak.

 

BESAUP GAWA… Bala kaban Biro Indu beripai ngemujurka aktiviti sida.

 

MANAH… Kuih Chuan digaga bala kaban Biro Indu Serakup Ngasi Sarawak.

 

PENGAWA LEMPUNG… Biro Indu besaup nungkung kachang ti deka dijual dikena ngiga belanja.