KUALA LUMPUR: Pengawa ngelakun baru pengawa nyain Bup Numbuhka Malaysia disadang entara pekara dianti nyerumba Hari Malaysia 2023 di Stadium Perpaduan, Kuching, Hari Enam tu.
Menteri Komunikasyen enggau Digital, Fahmi Fadzil ke mega Chairman Komiti Besai Hari Kebangsaan enggau Hari Malaysia 2023 madah, segmen nya dikena mulaika baru turai sejarah pengawa numbuhka Malaysia ari tuai ke dulu.
“Ba penemu aku, segmen chukup manah enggau nyelai,” ku iya lebuh nyadi temuai ba program Hari Malaysia 2023: Memaknai Segulai Sejalai ba Astro Awani, malam ensanus.
Ngelansa pasal rambai jaku Hari Malaysia 2023 iya nya Segulai Sejalai, Fahmi madah, semangat nya ulih dipeda nengah Kembara Kenali Borneo Yang di-Pertuan Agong Al-Sultan Abdullah Ri’ayatuddin Al-Mustafa Billah Shah enggau Raja Permaisuri Agong Tunku Azizah Aminah Maimunah Iskandariah.
“Kembara Kenali Borneo nyeremin raja enggau rayat semampai begulai sereta segulai sejalai.
“Tu meh rambai jaku Hari Kebangsaan enggau Hari Malaysia ti mai besai reti.
“Tuanku (Al-Sultan Abdullah) udah bejalai meda jalai, genturung pendiau lalu deriba kediri.
“Jarang kitai meda pekara tu dikereja. Tu mega narak penyayau ngagai institusyen raja,” ku iya nyemetak madah.
Nangkan nya, Fahmi madah, bemacham aktiviti diatur beserimbai Hari Malaysia di Kuching udah ditusun nyengkaum ngatur Pengawa Bejual Rahmah ngelingi Stadium Perpaduan, pemerindang main asal, konsert rayat enggau mantaika bungai api.
Pia mega, Arkib Negara deka mai bup numbuhka menua nya ngagai palan ti disadang digulu 3,000 iku.
“Aku ngarapka rayat Malaysia deka meda Pengerami Hari Malaysia di Stadium Perpaduan Kuching ba semua media.
“Anang enda ingat ngitau tambai Jalur Gemilang lalu meretika pemesai reti nyadi Bansa Malaysia,” ku iya. – BERNAMA
