KUCHING: Sepenyampau RM289,000 diagih Kaunsil Pemansang Industri Kayu Ramu Sarawak (STIDC) kena mantu 63 bengkah gempung ukai dikuasa perintah (NGO).

Agih belanja tu dikena NGO bejalaika aktiviti ungkup pengelantang mensia mayuh kelebih agi sida ke diau di Kampung Belawai, Kampung Jerijeh enggau Kampung Rajang.

Tuju bukai pemeri tu dikena ngelempungka tating belanja sida ke ngintu Gawai Dayak ti deka diintu 1 Jun tu.

Ku Sapit Kepala Menteri ke mega Menteri Industri enggau Pemansang Pengawa Dagangl Datuk Amar Haji Awang Tengah Ali Hasan, taja nadai ulih limpang lama tang ba bulan ti kudus tu pengelantang mensia mayuh agi dikemerat.

“STIDC deka seruran mantu enggau bekunsika rejeki ngagai mensia mayuh seraya meri pengelantang ngagai sida.

“Bantu tu dikearapka ulih ngelempungka tating belanja sida,” ku iya ke mega Menteri Kedua Pemansang Mengeri Enggau Pengeraja Asa.

Iya mansutka jaku tu rambau Pengerami Makai Lemai di Palan Konvensyen Borneo Kuching (BCCK) ditu, kilah ensanus.

Pengerami lemai nya udah digulu 13 buah sekula primari enggau sekondari sereta gerempung pengasih ari genturung pendiau di Kuching enggau Samarahan.

Berebak enggau nya, Awang Tengah udah nyuaka pemeri ngagai 180 iku anak patu balu.

Sama datai Menteri Muda E-Dagang Datuk Mohd Naroden Majais enggau Sekretari Perintah Nengeri Sarawak Tan Sri Datuk Amar Morshidi Abdul Gani.

PEMERI PENGASIH… Datuk Amar Haji Awang Tengah Ali Hasan (tujuh kanan) benung nyuaka pemeri mata duit ngagai 180 anak patu balu.

Suara Sarawak