• TAMPUNG ARI RUAI 1
BEMACHAM PRODUK
Bala temuai ari selampur menua ti nemuai ngagai Kuching nyengkaum rayat ditu empu patut ngelawa pasar nya.
Kebuah pia laban kita deka tepantup ati lalu enda pulai enggau jari puang lebuh nemuai ngagai pasar nya.
Mayuh barang dijual ba Pasar Serikin nyengkaum bemacham produk kraf jari, pekayan, pekayan asal pupu bansa, batik, anak patung, tikai, tikai tebal, tambak buah, kuie, ai irup, buah, sayur enggau ti bukai.
Tebal agi produk enggau bala pedaja dia datai ari Kalimantan.
Taja bebida bansa, jaku, jalai pengarap enggau menua tang sida chukup bebasa sereta kemerah nerima penatai bala temuai.
Nya kebuah lebuh nemuai ngagai Pasar Serikin, bala temuai berasai lantang, likun sereta enda nangi.
Nambah ke nya, tebal agi barang dia dijual enggau rega ti patut lalu ulih ditawar murah sereta bekualiti.
DEKA DATAI BARU
Siku temuai, Nara Embik, 69, madah, iya tekait sereta tepantup ati lebuh keterubah nemuai ngagai pasar nya empai lama.
Ku Nara, nya meh keterubah iya nemuai kia begulai enggau sida sebilik seraya ngelantangka ati maya ujung minggu.
“Bemacham bansa barang bisi dijual ditu kelebih agi kraf jari baka tanggi, raga, tikai lampit, tikai sana, bangku enggau mija ti digaga ari wi tauka rutan.
“Kelimpah manah dipeda, kualiti produk tu mega chukup ngemantup ke ati aku. Empai lama, aku bisi meli tanggi ti digaga ari buluh.
“Nya alai, aku bedanji deka nemuai kitu baru dudi hari,” ku tusui iya.
MAYUH PALAN NGELANTANG ATI
Lebuh nemuai ngagai Pasar Serikin, bala temuai mega bepeluang ngusung palan ngelantang ati ti bisi ngelingi nya.
Nya nyengkaum Gua Pari-Pari (Fairy Cave) enggau Gua Angin (Wind Cave) urung 20km penyauh ari Pasar Serikin.
Temuai mega ulih ngelawa Tasik Biru (Blue Lake) pengudah nemuai ngagai Pasar Serikin urung 21km penyauh ari pasar nya.
Pia mega, sida ulih ngelawa sebuah palan bebatu ti nyelai iya nya Paku Rock Maze Garden urung 26km penyauh ari Pasar Serikin enggau mayuh agi palan ngelantang ati ti bukai ngelingi nya.
Nya alai, kena meh peluang ti berega maya ujung minggu begulai enggau diri sebilik, bala bakih tauka orang dikesayau nemuai ngagai Pasar Serikin enggau palan ngelantang ati ti ngelingi nya.
Nya meh peluang kitai ngedutka pemanah kaul enggau sida kelimpah muai penusut runding pengudah gawa.
