Pengelandik ngaga sumpit mesti dipelajar dikena ngetan identiti pesaka bansa

Sumpit tu siti ari kereban lama ke dikena kitai Dayak kelia ngasu beburu, ngayau sereta pengawa bukai ke bekaul.
Taja pia, kemaya hari tu perengka tu agi diibun nyadika pesaka sereta dibantai lebuh bisi ngatur sebarang pekit tauka pengawa pemerindang ba atas panggau ambika chunto suah dibantai ba Kampung Budaya Sarawak.

Enti disebut ngaga utai ari pengelandik jari baka sumpit, endang mayuh orang nemu sereta landik. Pengajar Augustine Duncan madahka diri suba jarang tauka bedau kala meda sumpit dilagu orang enggau ukir tebuk penuh.

“Nya alai aku lalu nguji belabuh nengkebang ukir tebuk penuh batang sumpit awakka iya manding dipeda orang enggau bisi penyelai ari pendiau sumpit bukai.

“Nyadi aku belabuh ngaga sumpit ukir tebuk penuh dalam taun 2004 nyentuk diatu tang ukai nyadika batang pengawa dikereja besehari-sehari.

“Kebuah pia laban aku ke agi gawa nyadi pengajar nya alai semina ngaga lebuh maya lepa tauka bisi awak aja limpang aja,” ku peranak ari Sungai Klampai tu ti chukup siru ke kereban lama Iban awakka enda lenyau ngapa.

PERENGKA DIGUNA�Sekeda kereban tauka pat dikena nebuk lubang ukir ba batang sumpit.

Iya diatu benung ngajar ba sekula SK Ulu Sebatan di Saratok lalu bejalaika pengawa ngaga sumpit begulai enggau sida sebilik, dikereja ba rumah aja.

Ku Augustine, nadai mayuh orang nemu ngaga ukir tebuk penuh laban begunaka pengelandik jari nentuka likau ukir ke digaga manding tauka nadai penimpang.

“Milih bungai tauka motif ukir, chura sereta pemayuh bansa ukir ba siti batang sumpit begunaka runding ke tajam enggau penau ngambika ukir enda putus tauka alang-alang.

“Kitai enda tau enda nemu ni naka ukir nya apus lalu nama bagi motif ti dikerindu orang ke meli,” ku iya.
Ngelansa silik pasal pengawa ngaga sumpit ku Augustine, kitai dulu agi milih kayu ke udah chukup rangkai.

“Entara bansa kayu suah dikena aku ngaga sumpit iya nya Belian (Teras), Tapang, Tegelam, Kumpang Lendat, Kayu Garu, Meranti Bukit, Nyatu, Kayu Jati enggau Nibung.

ALUS… Batang sumpit ke benung diukir.

“Kelimpah ari milih bansa kayu, kereban bukai enda tau enda bisi iya nya batang paip alluminium, gam kayu, keretas pasir, mesin ketam enggau mesin drill.

“Nambahka nya, mata lungga dikena mega mesti chukup tajam kelimpah mat pat ke mayuh macham bansa,” ku terang iya seraya meransang rebak baru tau nguji belajar ngaga sumpit ungkup pesaka diri sebilik.

Ba rurun pengawa ngaga sumpit ku iya, kayu ke udah dipilih deka dibelah dua lalu diketam ngena mesin ketam dataika kayu alus.

“Udah nya baru datai ba pengawa ngelubang kayu ke udah diketam tadi.
“Tembu ngelubang, baru kitai ulih ngemasukka batang paip alluminium sereta lalu ngegam iya ngambika teguh, enda beginsit.

“Udah nya kitai nganti lebih kurang dua minggu baru gam nya chukup kering sereta rangkai.
“Pengudah dua minggu, kayu nya tadi digusuk dataika nyadi segala ngena keretas pasir.

LANDIK… Pengajar Augustine puh ngemeranka pengawa ngaga ukir tebuk penuh ba batang sumpit.

“Udah batang sumpit nyau segala endar, baru kitai ulih ngelekat ke kilum tauka simpai ba ujung sumpit.
“Tembu semua pengawa nya tadi, baru kitai belabuh nengkebang ukir penuh ba atas batang sumpit.

“Nambahka nya, bungai tauka motif ukir dikena enggau pengalus asil ukir bepanggai ba pengelandik jari siku-siku ngukir.

Shellack tauka chat kilat deka dichat pengudah kereja ngukir tebuk penuh tembu,�lansa iya silik.
Ku Augustine, lebuh baru nguji bejual sumpit suba, iya minta tulung menyadi diri empu nyual sumpit sebelah menua Miri enggau Bintulu nyentuk ke Sabah enggau Brunei.

“Diatu aku bisi udah ngaga Page ba Facebook ngena nama SARATOK BLOWPIPE ke alai semua penerang enggau gambar sumpit ke udah tembu bisi dibantai dia magang.

“Aku mega suah nerima udar nengah page nya, bisi sekeda sida minta digagaka ukir nunda ke lama tauka minta bungai ukir baru, nyengkaum chura.

KE PEMANDANG… Sumpit ukir tebuk penuh suah dipandang ba dinding rumah.

“Semua peminta sida ke ngudar naka ulih ditangkup nitihka randau enggau rega ke udah dipesetuju kededua piak,” terang Augustine pasal dagang sumpit iya.

Kelimpah ari ngelawa page SARATOK BLOWPIPE, mensia mayuh ke bisi ati deka meli tauka ngudar tauka betanya silik pasal asil jari Augustine tau telefon nuju lumur 013-292 8339 tauka anjung pesan Whatsapp ngagai lumur ke sama.

Ku iya, jaku peransang enggau sukung diterima ari mensia mayuh ngelama tu ngasuh aku ransing agi ngemeranka pengawa asal sereta ngetanka pemanah senyata asal kitai Iban menya.

“Orang ke chukup dipebasa enggau jaku lalau dikeingat aku nyentuk sehari tu datai ari Dato Hassan Sui.
“Iya mega udah meli tiga batang sumpit ukir tebuk penuh nyadika keresa dipandang ba rumah iya.

“Reti iya, ukai kitai bansa Dayak tauka Iban aja rinduka asil jari aku tu tang bansa bukai mega rindu meda ukir.
“Ex-Kaban Parlimen Saratok, Jelaing Mersat mega bisi meli empat batang sumpit ukir penuh ari aku, kelai sukung ngagai dagang aku mega,” ku Augustine temegah.

MANDING DIPEDA… Entara sumpit ukir tebuk penuh ke udah tembu digaga.

Genap iku kitai endang bisi juluk ati. Ba Augustine empu, iya deka meda pengawa nyumpit tu bisi diatur sereta dipekit ke orang ba peringkat Nasional.

“Nya kebuah aku meransang bala nembiak rebak baru anang enggai belajar enggau ngelala semua keresa, pesaka asal aki ini sida menya baka sumpit ukir tebuk penuh tu.

“Aku ngarap sida bisi pengerindu sereta pengeransing ngaga tauka ngadu kereban asal bansa kitai Iban laban ari nya sida deka berundingka chara nengkebang perengka tauka kereban asal kitai.

“Enti kelia, endang ari mit deka dipatih enggau diseridi ngereja enggau ngaduka pengawa baka nebang, ngeban enggau mayuh ke bukai.

“Kitai deka lenyau identiti enti sema rebak baru nadai pengangkun ngagai pesaka asal aki ini sida,” ku Augustine nyimpul randau enggau Suara Sarawak

Suara Sarawak