Pengelantang besekula diintu meruan

SERIAN: Perintah Sarawak ngayanka pengeran nengah agih belanja penyampau RM4 juta ninting taun dikena mantu ngelempungka tating belanja apai indai nyendiaka perengka sekula bala anak.

Menteri Pelajar, Sains enggau Pansik Teknologi Sarawak, Datuk Sri Michael Manyin Jawong madahka tuju pengawa tu meri pengelantang ngagai bala anak datai ari ruang bilik seranta bela ulih ngasai besekula baka orang bukai.

“Ba taun 2017, kabinet udah ngaga pemutus nikika baucher uniform ari RM100 ngagai RM200 ngagai bala penerima.

“Pengawa tu seriris enggau rega enggau kualiti barang niki ba makit,” ku iya nerang.

Iya mansutka jaku nya lebuh bejadika Program Nyuaka Bantu Uniform Yayasan Sarawak 2019 ba balai Sekula Sekondari (SMK) Tebedu.

KENANG… Manyin Jawong begambar ungkup kenang begulai enggau bala penerima baucher uniform sekula.

Manyin mega meransang bala komuniti ngemeratka pekara pelajar nyadi sebagi ari chara ngubah nasip sida dudi hari.

“Menua ti maju ukai dipeda ari sukut ngembuan pemansut asal iya, tang menua maju tu iya nya menua ti ngemeratka pelajar.

“Singapore, Taiwan, Korea Selatan, Denmark, Finland entara menua ti nadai pemansut asal tang sida maju agi ari menua ti bisi pemansut asal laban ngemeratka pelajar,” ku iya madah nyemetak.

Iya mega madahka program ngena Jaku English ngajar subjek Matematik enggau Sains deka berengkah dipejalai 1 Januari taun baru.

Ku iya, pengawa tu deka dipejalai ba sekula ti nerima sukung ari apai indai enggau nembiak aja.

Sapit Direktor Servis Bantu Pelajar Yayasan Sarawak, Ellen Manium Engang madah, sepenyampau 19000 baucher deka diagih ngagai selampur menua.

Pia mega ku iya, Bagi Menua Tebedu nerima 1300 baucher ngaul 1300 nembiak ari renggat sekula primari enggau sekondari.

“Sepenyampau 379 nembiak ari dua buah sekula sekondari enggau 24 buah sekula primari datai nerima baucher uniform,” ku iya.

Iya mega ngingatka apai indai ke alai baucher nya ulih dikena meli barang ba kedai ti nerima baucher uniform sekula ari Yayasan Sarawak.