SARATOK: Bala nembiak patut ngasaika palan ti lantang endur belajar ngambika sida ulih nerima utai dipelajar enggau meruan.

Ku Kaban Parlimen Saratok Ali Biju, pekara pengelantang endang nyadi fokus nentuka pelajar enda tejanggal ketegal penyuntuk enggau pengurang ditapi sekula kelebih agi ba menua pesisir.

Nya alai ku iya, sepenyampau 340 jemari udah diudar dikena nyikap buding Sekula Sekondari (SMK) Saratok ungkup pengelantang bala nembiak ke diau bemalam dia.

“Ari sukut penyikap perengkaguna ba sekula tu bisi berubah, majak nambah lalu tu dikena kitai ngepunka singkang ngemansangka sekula.

“Aku ngarap sebedau ujung taun tu, jemari ke udah diudar deka datai lalu meri pengelantang ngagai nembiak maya ngepunka sekula taun baru.

“Nya alai aku ngemendarka geran projek mit dikena nyeleti jalai enggau begunan sekula penyampau RM50,000 seraya ungkup Serakup Apai Indai enggau Pengajar (PIBG) RM20,000 dikena ngatur mayuh aktiviti ke pemansang sekula,” ku iya madah silik.

Ali mansutka jaku tu lebuh ngulu sereta bejadika Pengerami Nyuaka Tepa Nembiak Nyulut SMK Saratok 2019 diatur ba Balai SMK Saratok ditu, pagi tadi.