KUCHING: Opis Menteri Dagang Dalam Menua enggau Pekara Penguna (KPDNHEP) keran nentuka pengelantang pedagang enggau penguna semampai dijaga.
Menteri iya, Datuk Seri Alexander Nanta Linggi madah, sida mega bejalaika tanggung pengawa besai ungkup semua kelebih agi pedagang enggau penguna.
“Pekara penguna ukai naka nya aja tang kami deka nempa penguna pintar nengah pengawa berandau enggau advokasi.
“Ba dagang dalam menua, kami deka ngemansangka dagang ke manah agi ungkup sida deka ngaul dalam bidang tu kelebih agi raban nembiak,” terang iya.
Nanta mansutka jaku nya ba Pengerami Menteri Dagang Dalam Menua enggau Pekara Penguna begulai enggau raban media ba sebuah hotel tebilang ditu, ensanus.
Berebak enggau nya, iya madahka mayuh dagang dibuka ti deka nyendiaka pengawa puang kelimpah ulih mantu mensia mayuh kelebih agi maya pandemik Covid-19.
Ba lansa bukai, Nanta madahka opis menteri iya deka ngemeran konsep Sebilik Malaysia dalam program enggau inisiatif dipejalai sida ngambi nyukung Perintah Besai.
“Ambika banding, Kimpin Meli Barang Malaysia ke deka ditambah enggau leka jaku ‘sebilik’… deka nyadi Kimpin Meli Barang Malaysia Sebilik,” ku iya nerang.
Nambahka nya, iya ngarapka pemanah kaul kerejasama entara opis menteri enggau media terus ditanggam rat.
Ku iya, pemanah kaul enggau media beguna amat kelebih agi lebuh ngenataika penerang enggau berita baru ngagai mensia mayuh.
“Kami (KPDNHEP) chukup betuah laban ngembuan kaul ke chukup manah enggau media di Sarawak, Sabah enggau Semenanjung Malaysia.
“Media ngembuan tanggung pengawa besai ukai semina ngagai opis menteri tang perintah laban ulih ngenataika berita ke ulih dipechaya,” ku Nanta.
