KUCHING: Perintah Sarawak nengah Opis Pengintu Pengelantang Komuniti (JKM) udah bekunsi tanggungpengawa enggau Perintah Besai ba pengawa nyaga pengelantang rayat ba menua tu.

Menteri Pemansang Indu, Ruang Bilik enggau Komuniti, Datuk Seri Fatimah Abdullah madah, kebuah pia laban pekara nya udah dirintai ba rintai begulai ba baruh Jadual 9 nengah Sempekat Malaysia 1963 (MA63).

“Ba baruh rintai begulai nya, disebut pasal kuasa udah diberi ngagai nengeri bejalaika semua pengawa enggau program ti dipelanja Perintah Besai ungkup JKM.

“Reti iya diatu, JKM nya rintai begulai nengah Perintah Besai enggau Perintah Nengeri enggau mega ba bidang kuasa Perintah Nengeri,” terang iya.

Fatimah nibar jaku nya lebuh ditanya pasal meri kuasa JKM ngagai Perintah Sarawak ba Wisma Wanita di Jalai Sultan Tengah, kemari.

Ku iya, randau meri kuasa ba pengawa ngintu pengelantang udah tembu laban nya semina mungkur pekara wang.

Taja pia ari sukut atur pengawa, iya minta kuasa nya begunaka randau lenak agi laban nya bekaul undang-undang enggau isu teknikal undang-undang.

“Sebedau tu, utai ti dikerandau nya bekaul pekara wang. Lebuh bejaku pasal meri kuasa, kitai mesti berati ke semua pekara.

Ari sukut undang-undang, belanja enggau atur pengawa,” ku iya nyemetak.

Nya kebuah, Adun Dalat madah, tanggungpengawa ti dikunsi entara Perintah Sarawak enggau Perintah Besai chukup manah kelebih agi ari sukut nyaga pengelantang enggau peminta komuniti.

“Tu mega meri peluang ngagai kitai senentang chara baka ni mutarka isu ngambi nemu terang agi pasal utai ke nyadi dalam komuniti,” terang iya.