LUNDU: Urung 28 iku peranak enggau 55 buah Gerempung Ukai Dikuasa Perintah (NGO) ba Pelilih Menua Lundu nerima bantu belanja beungkus RM200,000.
Kaban Parlimen Santubong Datuk Sri Wan Junaidi Tuanku Jaafar madahka bantu belanja tu diberi ba baruh geran Projek Menua Pesisir (MRP).
“Pemeri MRP beungkus RM187,200 khas ungkup pekara pelajar enggau bantu ngenyit pasal pengerai.
“Dua pekara tu mesti diberi perati dalam nyaga pengelantang rayat,” ku iya.
Wan Junaidi bejaku munyi nya ba Balai Mensia Mayuh Lundu ditu, sehari tu.
Iya ti mega Menteri Pemansang Dagang enggau Gerempung Kerejasama madahka pekara pengerai amat berega sebaka enggau pekara pelajar ti ulih mantu ngemanahka siku-siku orang baikka ari sukut ekonomi enggau pengarap.
“Nyadi pengari rayat aku seruran ngetanka dua eleman tu terus diberi perati meruan,” ku iya
Berebak enggau nya, iya mega minta orang dagang mit enggau informal ngambika ngerejister dagang sida ngagai kaunsil kandang menua awakka sida ulih bulih bantu ti disediaka opis menteri.
Ku iya, dipelabaka dampih 2 juta dagang mit enggau informal agi bedau berejister ba selampur menua.
“Laban nadai berejister, opis menteri aku enda ulih meri bantu ngagai raban orang dagang tu kelebih agi sida ti balat kena pangka ketegal Covid-19.
“Kami endang meri perati ngagai penanggul ti ditapi sida tang sida mesti ngerejister diri awakka bantu ulih diberi nitihka atur ti patut,” ku iya.
Nangkan nya dalam nentuka dagang terus bejalai maya pengerekai Covid-19, Wan Junaidi minta raban orang dagang nyikap diri ngubah operasyen dagang sida ari tradisional ngagai digital.
“Deka tauka enda pekara digital udah nyadi pengidup baru laban ketegal Covid-19 orang tebal agi meli barang nengah tali arus.
“Sida ti enggai berubah, sida nyangka deka napi penanggul ngetanka dagang.
“Tang, bagi sida ti udah mujur ngubah dagang ngagai tali arus, sida deka ngasaika asil ti lebih manah,” ku iya.
Iya madahka, nitihka tinjau ti dipejalaika opis menteri, pengulih orang dagang nambah pengudah sida ngubah operasyen ba dalam tali arus.
