Pengelebih nguna dron ungkup betanam betupi

Pengeransing tiga iku bakih berakup penemu chara ngena dron ungkup betanam betupi ngujungka sida sepenemu muka sebuah serikat bepelasarka teknologi drone dikumbai CGIS Enterprise.

Sida tiga tu iya nya Churchill Juan, 32 asak ari menua Empit, Lubok Antu disaup dua bakih iya Calvin Wilfred,32 ari Long Silat, Ulu Baram enggau Donny Dhwie, 40 ari Punan Biau, Belaga.

Lebuh dirandau pemberita, pengari serikat CGIS Enterprise tu madah entara servis ke disedia sida sebuat iya nya sanding penemu pasal geospatial enggau ngaga kar gambar ari langit ke diambi ngena dron.

Kelimpah ari nya sida mega bisi nyendiaka servis meri gambar satelit enggau teknologi Sistem Pemadah Geografi (GIS).

Kenu ku Churcill sida siga bisi pengelandik ngereja pengawa ngena GPS tauka RTK sereta mega servis remote kontrol (Remote Sensing).

DRON…Churcill benung nyikap dron ke deka dikena ungkup ‘mobile mapping’.

“Kebendar chukup mayuh pengelebih tauka penyamai enti kitai nguna dron sereta GIS ba pengawa betanam betupi.”

“Ambika banding, pengawa ngena drone tu ulih ngelimat jam, belanja sereta muntang agi dibanding enggau pengawa ngaduka kar chara konvensional”.

Pengawa ngaduka kar ngena dron ulih mantu piak menijar kebun besai tauka orang siku-siku merambu enggau bejalaika pengawa ba kebun diri. Ambika chunto ba industri bekebun sawit.

“Ungkup ngaduka kar inventori nyema iya digaga ba kebun sawit pengelebih nguna dron iya nya kitai ulih ngelala penyampau pun sawit ba genap blok, pemesai ladang nyama ditemu kelimpah nemu pemanjai jalai enggau parit.”

Nya alai, pengawa ngena dron ungkup pengawa pengawa betanam betupi endang mantu bala menijar ngatur perambu ari sukut magi kereja sereta belanja ninting bulan, ku Churcill.

DRON…Churcill benung nyikap dron ke deka dikena ungkup ‘mobile mapping’.

Berebak enggau nya, Churcil madah ari pemisi data penyampau pun sawit ke ditemu ba genap blok mega dia siku-siku menijar deka nyamai ngira belanja baka ungkup pengawa meri baja.

“Pia mega lebuh deka ngaduka jalai enggau parit. Ari pemisi kar ke udah digaga ngena dron dia penyampau pemanjai infrstruktur ke patut dikemanah deka nyadi muntang sereta enda masau jam enggau belanja.

Ngelansa silik sentang pengelebih ngena dron, dia Churcill nerang ba sukut matau utai tanam ngena drone ulih ngelengkaska pengawa tembu baka matau pun enggau gaya kebun ba sebarang maya.

“Ambika chunto, siku orang bekebun iya ulih nemu dini bagi pun ke bisi penanggul tauka bisi kena serang penyakit,” ku iya.

Tandu Churcill, pengawa ngelala bagi pun sawit ke bisi kena serang penyakit enggau penanggul ke nyadi chukup beguna awakka kitai ulih jampat mutarka penanggul nya sereta ngichaka penyakit nya enda balat ngerekai ke bukai.

“Pengawa tu mega ulih dikereja enggau muntang nyema bisi dron laban dron ulih ngelala spektrum panchar ti mantul ari daun utai tanam.

“Teknik tu dikumbai ‘Normalised Difference Vegetation Indek (NDVI) enggau ‘Visible Atmospherically Resistant Index (VARI),” ku iya.

Nangkan nya, ku iya data NDVI enggau VARI ke ditangkap kamera lalu diambi bisi mandangka gelumbang panchar ke terang, lebih agi panchar ke semak kategori inframirah.

“Semua tu bepelasarka formula sains iya nya utai tumbuh ke idup manah deka nyerap gelumbang panchar ke terang lalu mantul baru ngayanka lampu mirah.

“Makin galak utai tanam, makin terang lampu inframirah ayan tauka mantul,” ku terang Churcill seraya madah ngena dron pengawa matau kebun sekalika nya pun sawit deka ulih dikereja enggau mudah.

Kelimpah chakah ba pengawa dagang, CGIS Enterprise tu mega bisi nempa kaul sekeda ejensi sereta Gerempung Ukai Perintah (NGO) dalam ngatur kus ngaga kar komuniti ungkup sesebengkah kebun besai.

“Naka tu pengawa ti agi dikereja ba renggat pemungkal tu deka dipejalaika enggau enda bebayar seraya nyadi tanggung pengawa rama korporat (SCR) ari serikat CGIS.

“Tuju iya awakka komuniti bela bisi data kebun diri sereta ngasaika pemaik ari teknologi dron ke dikumbai ‘mobile mapping,” ku Churcill.

Penerang silik pasal servis tu tau betelefon terus nuju tiga anak Dayak ke berakup penemu dalam ngemansangka siti dagang baru bepelasarka teknologi dron tu iya nya Churcill ba lumur 0178027330, Calvin (0148667307) enggau Donny (0128095919).

Ungkup penemu, dron tu dikumbai sebansa bilun mit tauka dikumbai robot terebai. Iya nadai begunaka orang deriba.

Pia mega, dron bisi dua macham kesatu bisi bansa ke ngena remote kontrol lalu kedua nitih sistem automatik ke udah diprogram.

Jeman diatu pengawa ngena dron nyau majak ngerembai engkeman ungkup pengawa ke tusah dikereja mensia baka ba bidang media, penengkebang filem, agrikulcha , dagang enggau penerit adat.

BAKA TU…Churcill (kiba) benung nerebaika dron seraya ngambi gambar kar ladang.

Suara Sarawak