KUCHING: Sarawak ulih mutarka pengelemi dalam sistem ngintu pengerai di menua tu enti sema diberi kuasa otonomi pengerai. 

Kebuah pia laban lebuh bisi otonomi pengerai, Sarawak ulih merambu servis ngintu pengerai ti engkeman agi nitihka peminta. 

Pekara nya dibantai Sapit Premier Sarawak Datuk Seri Dr Sim Kui Hian seraya madahka Sarawak ulih ngatur semua tu enti enda ditagang atur menua laban Sarawak ngembuan penyampau peranak ti mimit. 

“Meri kuasa otonomi pengerai ngagai Sarawak enda madamka semua takah bida enggau atur nganjung pemesai tauka pakar berubat ti sebela.

“Taja pia, otonomi pengerai deka nentu Sarawak mutarka atur ti enda sebela nengah bemacham strategi.

“Sekeda strategi tu baka meri insentif ti lebih manah ngagai pengereja pengawa perubat enggau pengerai ti sanggup gawa ba sitak jauh di Sarawak,” terang iya ba sebengkah randau enggau media ngena pejuluk ‘Sarawak: Sebuah Kuasa Ekonomi Baru’ apin lama. 

Taja pia, Dr Sim ti mega Menteri Pengerai Mensia Mayuh, Pengawa Berumah Enggau Perintah Lokal madah, pekara nya enda ulih dipejalai enti sema nadai kuasa otonomi pengerai. 

Ku iya, pekara bekaul pengerai mensia mayuh enggau perubat diatu ba baruh ‘Senarai Serentak, Jadual Kesembilan Perlembagaan Persekutuan’ (Concurrent List, Ninth Schedule of the Federal Constitution).

Nya alai, iya madah, pekara nya mai reti endang tanggungpengawa Perintah Nengeri merambu enggau ngemanah servis.

“Kebuah pia laban Sarawak meseti nitih atur menua ari sukut perengkaguna enggau staf.

“Ambi ke chunto, perengkaguna enggau servis baka sepital riman ungkup Sarawak enggau makmal pengerai mensia mayuh ti diau ba penuduk ti baruh ba rintai dikenati Perintah Besai,” ku iya. 

Nitih statistik Opis Menteri Pengerai (KKM) 2021, penyampau lutur di Sarawak bisi 4,262 iku, iya nya 3,656 sektor perintah enggau 606 sektor peribit. 

Ungkup indu misi, bisi 8,243 iku iya nya 6,606 ba sektor perintah enggau 1,637 ba sektor peribit di Sarawak.