AKU endang arapka berita nya semina mimpi tang pekara tu amat nyadi, sinu ngenang pemidang siku Raban Elvis Sarawak (ETA), Ges Berundang tauka dikangau Elges Presley midang maya beumur 65 taun ketegal sakit jantung ba Palan Jantung Samarahan.
Ngelansa kenang maya hari pemidang niang Elges, kebendar bisi siku kaban ETA pemadu biak kami, Adrian David Jr bisi telefon ngagai aku lebuh gawa Hari Enam (25 September) madahka Presiden Elvis Presley Fan Club of Sarawak (EPFCS) kami udah midang.
Niang endang bakih ke kala enggau aku begulai gawa ba New Sarawak Tribune enggau dulu ari nya iya kala mega gawa nyadi pegawai kanan opis Salcra.
Nya kebuah, iya suah begulai enggau kami dalam King Rock N Roll. Pemidang iya pengelenyau besai ngagai EPFCS.
Iya mega udah rejister kelab kami ba Ros ba taun 2014 enggau ngiring kelab nya nyentuk iya midang.
Niang ke mega nyadi tuai kelab chukup chakah ngiga belanja ari bala menteri, tuai politik, pedagang enggau sida ke tebilang nama.
Belanja nya dikena ngatur bemacham aktiviti baka merindang, baum enggau ke bukai.
Aku berengkah ngelala niang Ges tu dalam taun 90-an. Kami duai ngembuan pengerindu ke sebaka iya nya rindu karaoke.
Kami duai betemu baru pemulai aku ari Brunei ba taun 2002 lalu taun nya mega iya bulig gelar Elvis of Kuching.
Lebuh aku gawa nyadi deejay sementara di Sapphire Executive Pub and Lounge (ngajar muak ke pagi dalam taun 2004/2005), Elges dianjung merindang dua kali seminggu iya nya malam Hari Tiga enggau Hari Lima.
Kenyau ari nya, maya Hari Enam, iya suah merindang enggau bala ba mayuh endur di Kuching, Kuala Lumpur enggau Sabah Elvis (Chris Gomez).
Kami duai mega bebakih lalu aku ke suah enggau iya lebuh kami duai begulai merindang baka di Bau (2002 lebuh iya agi gawa enggau Salcra), 2007 ngagai 2016 (di Kampung Sorak Dayak Serian); Sibu (2007); Mukah (Pengerami Kaul ba taun 2012), di Bintulu ba taun 2012 laban dikangau petunggal aku, Richard Abunawas, Residen Betong diatu nyadi pengari Residen Bintulu) enggau KK (2012 ungkup semilan ETA Malaysia).
Nambahka nya, kami mega kala ngagai Julau (Program Astro ba taun 2013) Sri Aman (Pengerami Benak 2014), Kapit (merindang empat kali kenyau ari 2013), PJ di Kuala Lumpur (2014/2016) lalu kenyau ari 2014 kami mayuh merindang di Kuching enggau Samarahan di hotel, pub enggau ke bukai.
Lebuh merindang ba luar Kuching, kami suah bekunsi bilik lebuh bemalam di hotel.
Ba New Sarawak Tribune keterubah dalam slot Pemerindang ngena nama Anya Kedap berengkah 2004, aku bisi nulis pasal Elges ke baru pulai ari AS pengudah bulih skrol ari sebuah palan pelajar tinggi din lalu bisi ngabas Graceland di Memphis, Tennessee.
Peranak asal Lempaung, Betong tu bisi rumah di Sri Aman lebuh iya mai aku meresa penyuwa ti nyuwa din lebuh merindang di Pengerami Benak ba taun 2014.
Iya ditumbak kena Hari Satu nyin kemari lalu besampika semengat niang diau lantang ba serega.
