KUCHING: Opis Menteri Pengangkut Sarawak merambu bejalaika Traffic Game nyadi sebagi ari program pelajar ba sekula selampur Sarawak.
Menteri nya, Datuk Seri Lee Kim Shin madah, inisiatif nya dikena meransang program meri penyedar enggau chara engkeman dikena ngelakuka pengelikun jalai alun ti ngasi agi.
“Semua orang nemu senentang Traffic Game, nya alai, juluk besai kitai iya nya deka meri pangka besai ngagai penguna jalai alun kelebih agi bala nembiak.
“Ambi ke chunto, kitai ulih berengkah ba Bagi Menua Kuching nengah pengawa bejalaika program tu entara sekula ngagai bala nembiak ditu.
“Pia mega, kitai bisi program pengelikun jalai alun ABC (ulah, gaya, ubah) ba Kaunsil Pengelikun Jalai Alun (MKJR) Bagi Menua.
Kim Shin nibar jaku nya rambau nemuai ngagai taba Kaunsil Pengelikun Jalai Sarawak ngagai Taman Trafik Kenyalang, kemari.
Ba lansa sebaka, iya madah, MKJR Sarawak diberi pangku pengawa nampung Traffic Game nya ba taun tu.
Lee nyemetak madah, pekara nya udah dipesetujuka asil ari aum ti diatur begulai enggau raban MKJR kemari.
Ku iya, nama main nya diatu iya nya Main Kaunsil Pengelikun Jalai Alun Trafik Sarawak’ dikena nyilih nama sebedau tu, Shell Traffic Game.
“MKJR deka mangku pengawa tu dikena ngangkatka baru Traffic Game bepelasar ke projek sukung komuniti.
“Kitai deka nerima sukung ari ejensi bekaul nyengkaum Perintah Sarawak dikena ngemujurka program tu,” ku iya.
Iya madah nyemetak, pekara nya berebak ari Perambu Strategik Pengelikun Jalai Alun 2021-2025 nyadi sebengkah inisiatif dikena meri penyedar ngagai penguna jalai alun ba Sarawak.
“Tuju asal program tu iya nya dikena ngurang ke penusah aksiden ba jalai alun lalu kitai udah ngaga pansik bekaul pekara tu,” ku iya.
