Pengerai raban gawa diluan meseti dikemerat

KUCHING: Kaban Parlimen Bandar Kuching Dr Kelvin Yii nyuaka 24 kutak “B Fusion Oral Dispersible Powder” berega RM 12,000 dipelanja WBG Asia Pacific (M) Sdn Bhd ungkup raban gawa ba luan ti gawa ba Palan Meresa Covid-19, Kompleks Nembiak enggau Lumba ditu.

Ku Kelvin, B Fusion tu ngundan mayuh vitamin C enggau antioksidan ti ulih nambahka pengetan tubuh kelebih agi ungkup raban gawa ba luan ti ninting hari betegu enggau Pesakit Agi Dipatau (PUI) enggau engka sida tu positif Covid-19.

Nya kebuah ku iya, B Fusion tu beguna amat ngagai raban gawa ba luan ba palan meresa nya kelebih agi nyaga sida laban makin mayuh orang datai beperesa kia.

“Nitihka penerang, lebih ari 100 PUI diuji positif nengah palan beperesa nya enggau nya kebuah kami datai nyaga raban gawa ba luan ngambi sida ulih gawa enggau lantang kelimpah nyaga sida sebilik enggau orang dikesayau sida,” ku iya.

Kelvin Yii mansutka jaku nya pengudah nyuaka pemeri nya begulai enggau Kaban Kunsil Nengeri (Adun) Pending, ditu kemari.

Dr Yii pechaya, makin mayuh raban gawa diluan patut dijaga ngambi sida ulih nyaga enggau meresa rayat di menua tu.

“Taja dikangau raban gawa ba luan tang staf perubat kitai nya ke bendar iya, raban penyaga menua kepenudi ke alai, enti sida puntan nyaga pengerai nyadi kitai deka alah ngelaban virus tu,” ku iya.

Berebak enggau nya, iya madahka kitai bempu tanggungpengawa nentuka sida disukung enggau dijaga manah.

“Enti enda, semua kitai deka napi penusah,” ku Kelvin lebuh ngelaluka kerejasama strategik ngaul sektor peribit nyendiaka bantu sereta pemeri nentuka raban gawa ba luan nerima sukung.

Kelimpah ari nya, Dr. Yii semua orang bempu tanggungpengawa ngelaban pandemik Covid-19 tu enggau sama nyaga pangan diri.