Pengerai rayat dikemerat

KUCHING: Sarawak enda berumban deka ngatur pengawa bepilih besai nengeri (PRN) ke-12 laban agi beratika pengawa munaska pengerekai pandemik Covid-19.

Pekara nya dipansutka Kepala Menteri Datuk Patinggi Abang Johari Tun Openg ke nyemetak madah pasal pengawa bepilih besai nengeri (PRN) deka dikira dudi laban nyawa patut diidupka dulu.

“Kitai agi darurat, pengawa bepilih besai nengeri ulih (diatur) dudi. Tang ungkup (ngidupka) nyawa, enda ulih (betangguh) sebarang maya, ”ku iya.

Iya madah munyi nya ba aum pemberita maya ditanya sekalika PRN deka diatur pengudah Program Imunisasyen Covid-19 ba Sarawak tembu ba bulan Ogos taun tu.

Dulu ari nya iya bejadika pengawa meri vaksin Covid-19 ngagai raban terabai komuniti ba Stadium Perpaduan di Petra Jaya kemari.

Abang Johari suah nandu madahka raban sida seruran nentuka pekara ke pemadu manah ungkup pengerai rayat Sarawak lalu deka meda diau ba nengeri tu likun sereta ulih mutuska pengerekai penyakit Covid-19.

“Nya alai, kitai (Perintah Nengeri) nadai berundingka pekara bukai, kitai semina ngemeratka pengerai rayat dulu,” ku iya.

Berebak enggau nya entara pengawa ke udah digaga Perintah Sarawak iya nya nyendiaka perengka guna kuarantin enggau bemalam ba hotel dikena nagang pengerekai Covid-19.

“Sepenyampau RM71 juta belanja udah dikena dalam timpuh setaun tu dikena nagang pengerekai Covid-19 lalu nya enda nyengkaum ungkus bantu ungkup rayat ti kena keruga.

“Taja pia, dalam kitai mantu rayat, bisi jereki bukai ke datai baka tetemuka gis baru ba Sitak Luconia Tengah ke bepalan urung 80 kilometer ari kandang tasik Sarawak kena 10 Februari ke udah ari bala Petronas.

“Nya alai, kitai deka berunding enggau Petronas bekaul enggau asil gis ke baru ditemu tu, nengeri tu ulih meri bantu ke lebih mayuh ngagai rayat,” ku iya.

Datuk Patinggi Abang Johari Tun Openg

Suara Sarawak