Pengeraja Asal Sarawak

KITAI betuah laban idup ba menua ti meruan ngemeranka chara enggau daya idup asal.

Sarawak ngembuan mayuh palan pesaka asal enggau lubang batu ti digazet enggau diaku ba rintai Serakup Pelajar, Saintifik enggau Main Asal Gerempung Bansa Dunya (Unesco).

Pemanah rampa menua ngemegahka nama Sarawak sereta nyadi pematak penatai bala temuai ari menua tu empu enggau menua luar.

Kelimpah ari nya, Sarawak mega tebilang ngembuan mayuh kampung tuai, pulau galau enggau pemakai menua, pengelain bansa utai idup enggau utai tumbuh.

Nya alai pengawa ngintu enggau nyaga pemanah rampa menua patut chakah agi dipejalai nentuka iya seruran bisi dipeda rebak dudi kelimpah nyadika pesaka dunya.

Sarawak ngembuan 40 bengkah Taman Negara ti udah digazet lalu tu ngelaika Perintah Besai beratka pengawa nyaga pemanah rampa menua kitai.

KELAI MENUA… Burung kenyalang kelai nengeri Sarawak tauka dikelala nama Bumi Kenyalang.

Taman Rampa Menua Asal Piasau

Sebengkah palan ba tengah mengeri Miri diatu digalau kena nyaga enggau ngetan pemanah rampa menua baka jelu siga enggau utai tumbuh ke bisi ba kampung nya.

Pengawa numbuhka palan nya ulih meri pengelebih ngagai menua kitai laban ngembuan dandang kampung ti digalau.

Kampung tu digalau nentuka rebak biak ngelala enggau beratika pemanah endur nyaga sekeda bansa jelu siga enggau utai tumbuh ke majak punas.

Dia mega bisi nyaga burung Kenyalang ti nyadi lambang menua Sarawak ti digelar Bumi Kenyalang.

Nya alai, semua rayat kelebih agi ba Miri dipinta bela besaup nyaga palan tu ngambi ulih matak temuai ari serata dunya kelimpah ngintu pengelain utai tumbuh enggau utai idup dia.

NYAGA JELU SIGA…Semenggoh tu nyadi palan ngintu enggau nyaga Orang Utan enggau jelu bukai.

Rampa Menua Asal Digalau Semengoh

Taman tu nyadi palan nyaga jelu siga ke majak punas diatu baka Orang Utan enggau mayuh agi jelu bukai.

Ba taman tu, kitai ulih meda mayuh macham jelu dilepas enggau jelu ke dikurung dalam sangkar nyema dipeda siga ngambi enda ngeruga pengelikun mensia mayuh ke ngelawa endur nya.

Taman tu beguna amat dijaga manah ngambika kitai ulih nyaga jelu siga enggau jelu bukai ke majak punas ba kampung.

Nambahka nya, taman tu mega patut dijaga ngambika rebak baru ngelala jelu siga ba menua kitai tu.

Semenggoh wildlife tu ulih dilawa urung 20 kilometer ari mengeri Kuching lalu taman tu berengkah dibuka ba taun 2000.

Palan tu tebilang enggau suah dilawa bala temuai ari menua tu enggau menua luar ti rindu meda sereta ngelala jelu siga.

PESAKA MENUA…Kampung endur mayuh spesis jelu enggau utai tanam ba Lambir ke ulih matak bala temuai menua tu enggau menua luar nemuai kia.

Gua Angin Enggau Gua Fairy

Gua Fairy suah dilawa bala temuai rindu ngayam pemanah rampa menua enda jauh ari mengeri Kuching.

Lubang batu tu mega bisi disediaka jematan kayu ngambi bala pengusung ulih nimpai pemanah rampa dalam nya baka meda stalaktit enggau stalagmite.

Bala temuai ke tama dalam lubang batu nya dipinta ngena lampu laban lindung sereta petang.

Enda jauh ari lubang batu nya mega bisi sungai endur belepa enggau ngelantang ati seraya mandi ai wong ke bisi ba bukit.

Dia mega bisi disediaka palan paking kerita nyentukka pintu penama lubang gua.

Gua tu suah dilawa temuai ari menua luar laban rindu ngayam pemanah rampa menua kelimpah ngelantang ati.

UNGKUP PENGELANTANG… Chalet tauka endur bemalam disedia ungkup bala temuai ke deka bemalam ba Batang Ai Hilton.

Taman Negara Bukit Lambir

Taman Negara Bukit Lambir entara kandang menua ngembuan mayuh macham bansa jelu siga enggau utai tanam pemadu dedat ba dunya.

Taman negara tu 52 hektar pemesai lalu ngembuan 1,050 bansa kayu bebida enggau endur 1,200 bansa indu utai nepan ba kayu nya.

Sida ti rinduka aktiviti kasar tau ngerenchah kampung enggau niki Bukit Lambir peninggi 464 meter lalu nimpai pemanah rampa menua Miri ari tuchung bukit.

Ba bukit nya mega bisi begunan pemanchar 22 meter peninggi ngambika kitai ulih ngasai enggau nimpai utai tumbuh tauka burung enggau indu utai.

Baka ba taman negara bukai, iya mega bisi ai wong endur bala temuai mandi pengudah lelak bejalai matau kampung dia.

Kitai ulih ngelawa taman negara tu urung 30 minit ari mengeri Miri ke nyadi mengeri kedua pemadu besai ba Sarawak.

Bala temuai ulih milih deka ngelawa endur nya pulai hari tauka diau bemalam laban perengkaguna ungkup sida bisi disedia.

BATU KAPUR… Chugit ke chukup tebilang ba Mulu.

Taman Negara Similajau

Urung 30 kilometer penyauh adap Utara Bintulu lalu nyadi taman ke bisi pantai enggau mayuh bansa jelu siga.

Tebing tasik taman tu bisi pasir chura kuning emas lalu diuan mayuh bansa jelu siga.

Jagu ai masin suah ngeredai diri baruh mata panas kelimpah ditapatka penyu betelu.

Bansa jelu jangkit baka kera, nyumbuh, rasung sereta bisi 185 bansa burung nyengkaum burung lang engga kenyalang.

Similajau tu tau dilawa sida ke rindu meda burung kelimpah meda jelu siga bukai.

Pia mega, bala pengusung ulih nimpai pemanah kandang tebing tasik Similaju bedarat nengah pantai enggau nepan bot.

LUBANG BATU… Gua Niah tu pengentap mensia kelia pemadu tuai ba Asia Tenggara.

Taman Negara Batang Ai

Taman tu mungkur kandang tasik digaga mensia ari tekat ai lalu endur raban bansa Dayak Iban nirika genturung pendiau.

Bala temuai bisi peluang begulai enggau peranak rumah panjai bejalai ke kampung enggau beratika gaya pendiau jelu Mayas.

Sida mega ulih ngelimpangka awak diri ngasaika daya idup, begulai sereta bekelala enggau sida ke diau ba rumah panjai nya.

Nambahka nya, baka pengusung ti nemuai kitu tau milih diau ba hotel ari serikat hotel Hilton ti digaga baka rumah panjai di Sarawak ungkup pengelantang semua.

Bala temuai ulih ngelantangka ati lebuh nimpai pemanah rampa menua ditu kelimpah beratika daya idup adap menua Lubok Antu.

Taman Negara Loagan Bunut

Loagan Bunut ba Miri tu kandang tasik pemadu besai ba Sarawak ti bisi 650 hektar pemesai.

Nama Loagan Bunut tu diberi bansa Berawan lalu penyelai tasik deka lenyau maya musin landas iya nya ba bulan Februari nyentuk Mei tauka June.

Lebuh tasik tu rangkai, mayuh jelu ulih dipeda ngerayap tauka bejalai nengah kandang tasik baka rusa, jani kampung, pelanduk, kera enggau nyumbuh ke bisi dia.

Orang Berawan suah berikan dia lalu sida ngena chara selambau lebuh ai besai.

Loagan Bunut tu jauh ba menua ulu iya nya 130 kilometer penyauh ari mengeri Miri ke alai semina ulih dilawa ngena entukar 4WD.

MANAH DITIIMPAI… Gaya menua enggau rumah ke bisi ba Loagan Bunut dipeda ari atas.

Taman Negara Mulu

Taman Negara Mulu nyadi sebagi ari kandang menua diaku nyadi Palan Pesaka Dunya.

Mayuh peneleba ulih diasai enggau penemu baru diserungkai nyengkaum ngelawa lubang batu pemadu besai, niki bukit bebatu, ngerenchah kampung, ai wong enggau lumba kasar sereta ngusung pengentap peranak asal ke agi bisi diatu.

Entara penyelai lubang batu bisi dia baka Sarawak Chamber ti chukup besai seraya Gua Rusa ti ngembuan jalai pemadu besai enggau sungai pemadu panjai ba Asia Tenggara dalam Gua Ai Chiru manggai 108 kilometer pemanjai.

Serumba lemai hari, bala temuai ulih meda bejuta iku semawa terebai baka ai sungai terus ari Gua Rusa lebuh sida pansut ngiga pemakai.

Dia mega bisi mayuh bansa jelu enggau utai tumbuh baka paku, kulat enggau ke bukai nyengkaum 15 bansa kampung ke bebida.

Ba Taman Negara Mulu tu bisi 170 bansa orkid enggau periuk kera ke nyelai ba menua kitai, entara endur pemadu manah bisi dia iya nya chungit ba Gunung Api ari batu kapur digaga lunchik sereta tajam ngelingi taman negara nya.

Lebuh kitai bejalai ba taman sida, kita ulih tetemuka bansa asal baka Iban, Berawan enggau Penan.

Taman Negara Mulu bisi nyendiaka endur bemalam ungkup bala temuai baka Royal Mulu Resort tauka endur memarin ti disediaka sida dia.

NYELAMBAU… orang Berawan nangkap ikan ba sungai sida ngena chara nyadak ikan tauka dikumbai sida selambau.

Taman Negara Niah

Gua Niah tu palan temuai pemadu tebilang nyadi pengentap mensia kenyau 40,000 taun ke udah lalu bisi bekau ditinggalka mensia kelia ba lubang batu tu enggau pemadu tuai ditemu ba Asia Tenggara.

Bekau sejarah tu meri peluang ngagai bala temuai ngasai kediri empu penyelai pengentap pemadu tuai tu.

Turai ba dinding lubang batu baka perau agi mengkang dijaga ngambika semampai bisi dipeda bala pengusung.

Bala temuai ulih datai kitu dalam timpuh dua jam pejalai ari Miri tauka Bintulu kelimpah bisi disediaka endur bemalam.

Palan pematak temuai nya sebagi ari penyelai ke ulih diasaika bala temuai lebuh nemuai ngagai Sarawak.

Sarawak ti nyadi nengeri pemadu besai ba Malaysia agi mengkang ngetanka daya idup asal ti ulih matak temuai ngasai kediri empu peneleba kelimpah nyerungkai resia rampa menua ti bedau ditemu mensia mayuh.

Nya alai, kitai patut nyaga enggau ngintu penyelai tu ungkup semua kelebih agi rebak baru ngambika sida ngelala pengelain bansa jelu siga enggau utai tanam ke majak punas.