Pengerami begempuru ba zon merah enda dikemendar

KUCHING: Sarawak ngerikodka 419 kes baru positif Covid-19 kemari lalu ngujungka penyampau kes positif Covid-19 di menua tu nambah 17,554 kes.

Chairman Komiti Penyangga Penusah Ngenyit Nengeri (JPBN) Datuk Amar Douglas Uggah Embas madahka kes positif tu ditemu ba Pelilih Menua Sri Aman ngerikodka (159) kes, Bintulu (57), Sibu (54), Miri (34), Sarikei (32), Serian (17), Meradong (17), Marudi (9), Beluru (8), Kanowit (5), Kapit (5), Saratok (5), Julau (4), Sebauh (3), Kuching (3), Matu (2), Lawas (2), Mukah (1), Selangau (1) enggau Dalat (1).

“Penyampau kes positif sehari tu (kemari) nyadi kes positif ti kedua pemadu tinggi diripotka.

“Ari 419 kes nya, 159 kes datai ari Sri Aman ti ditemu ba Rumah Jil Sri Aman,” ku iya.

Kelimpah ari nya, Sapit Kepala Menteri nya mega madahka bisi siti kes pemati dirikodka kemari ketegal Covid-19, ngujungka penyampau pemati di Sarawak bisi 114 iku.

“Kes pemati ti ke-114 siku lelaki beumur 76 taun ti diperubatka ba Sepital Bintulu laban sendat seput.

“Peresa rt-PCR ti diambi kena 9 March madahka iya positif Covid-19 kena 11 March sebedau iya ditukuka nadai kena 3 April,” ku iya.

Tandu Uggah, kenyau pun taun tu, mayuh kes positif komuniti datai ari pengawa ‘pengerami rama’.

“Bisi 59 kluster ngaul pengerami begelumu ti ngujungka raban bekuasa meresa 71,545 iku.

“Ari penyampau tu, 7,305 iku ditemu positif Covid-19 nyengkaum 40 kes pemati,” ku iya.

Ku iya, entara kes positif pemadu tinggi dirikodka iya nya ari pengawa rabat, pengerami nikah, ngintu hari pengada, hari beserara, nyabung manuk enggau ke bukai.

“Nya alai, mensia mayuh dipinta bekerejasama nitihka Atur Pengawa Standard (SOP) ngetuka dulu pengawa begelumu bebala mayuh.

“Pengawa ngatur pengerami, melah pinang, betunang, pengerami aqiqah, ngintu hari pengada, reunion, retreat enggau ke bukai semina dikemendarka ba zon gadung enggau kuning aja kelimpah enda ngelui 50 peratus.

“Bagi zon mirah enggau oren, pengawa ngatur pengerami begempuru enda dikemendarka,” ku iya madah.

Suara Sarawak