Trending

Pengerami Gawai Dayak nanggam pengerindu

Facebook
Twitter
WhatsApp
Telegram
E-mel

AKU enda tentu nemu pasal pengawa miring tauka baka ni ngereja iya baka Iban bukai ke megai pengarap asal di Sarawak.

Taja pia, aku kala ngemata pengawa nya enggau pengawa bukai mega baka pengawa Namaka Tuah enggau Sandau Hari.

Taja pen aku megai pengarap Kristian, aku enda kala enda bebasa ke bansa bukai tauka pengarap bukai nyengkaum pengarap asal Iban.

Ari maya aku agi biak suba, aku udah diajar apai indai enggau bala paderi Katolik ari menua tasik bebasa ke bansa, adat enggau pengarap bukai.

BISI BIDA TANG SEBAKA

MINGGU PENYERAKUP… Minggu Penyerakup ti diatur ba Tebing Sungai Kuching nya kelai rayat pupu bansa idup beserakup lalu ulih segulai sejalai.

Father David Bingham, siku paderi ari England, kala mela komuniti Iban ba Sarikei, Kanowit, Simanggang, Binatang (diatu Bintangor), Julau, Sibu, Selangau, Song enggau Kapit entara taun 1965 ngagai taun 2005.

Paderi enggau peninggi lebih enam kaki setengah nya chukup landik bejaku Iban lalu bisi penemu pasal pengarap, adat enggau main asal Iban.

Ba Mei 2005, iya pulai ke England nyadi Penyeraris Pekara Wang Antarabansa Gerempung Mill Hill Missionaries kelimpah ngereja pengawa Gerempung Pengerembai Pengarap (AFP).

Father David Bingham midang lesi bebadi ari dunya injau tu kena 27 Januari 2018.

Enti iya betemu enggau aku suba, niang endang suah bekunsi ke penemu sereta peneleba iya begulai enggau orang Iban.

Bisi sekali iya becherita ngagai aku pasal penemuai iya ngagai siti rumah panjai ba Song, Kapit.

Iya maya nya mela raban Kristian ba sebengkah rumah panjai. Sida serumah dia madah ngagai iya, bisi rumah panjai enda jauh ari rumah sida ke deka ngereja pengawa Sandau Hari.

Laban ke deka nemu nama pengawa nya, Apai Bingham pen mupuk bejalai ngagai rumah panjai nya.

Maya iya niki rumah panjai nya, sida serumah benung besedia deka miring.

Tuai rumah ngelala Apai Bingham lalu ngambat iya, tang madah sida serumah agi megai pengarap asal Iban lalu deka ngereja pengawa miring.

Apai Bingham madah ke diri kia laban deka meda pengawa sida lalu nadai runding deka ngachau pengawa sida.

Iya semina deka nemu nama pengawa nya.

Pengudah iya pulai ari merati ke pengawa miring nya, iya pen berunding ti ngujung ke iya bulih penemu baru.

Penemu nya meh dikunsi iya mega enggau aku.

“Aku merati ke sampi Iban dipunka enggau ‘sa, dua, tiga, empat, lima, enam, tuuuujuh.’ Naka nya aja.

Enda datai sepuluh. Dia aku meda bisi pekara dalam pengarap asal Iban ke sebaka enggau pengarap bansa Judah sereta pengarap Kristian.

“Ba Bup Pemungkal dalam Bup Kudus, Allah Taala disebut ngaga dunya dalam kandang tujuh hari.

“Pia mega kitai bisi tujuh hari dalam seminggu, lalu kitai bisi tujuh sakramen. Abi telih Jesus ba regang mega tujuh iti.

“Nama reti lumur tujuh tu? Tujuh endang lumur ti dikumbai mungkur semua tauka genap dalam pengarap bansa Judah.

“Lumur tuchi. Reti iya chukup, penuh,” ku Apai Bingham.

Dia mega aku belajar siti pekara ari sida ke bisi penemu dalam (wisdom), iya nya ari ke ngiga bida, manah agi ngiga pekara ti sebaka.

Ari ke ngiga pengurang orang bukai, manah agi ngiga lalu nyagu pengelebih sida.

BEBASA KE ORANG BUKAI

NGEPAN ASAL… Bala indu chukup bajik dipeda bengepan.

Bansa Dayak, baik ke nya Iban, Bidayuh enggau Orang Ulu, endang bansa ke tebuka ati ngagai bansa bukai baka bansa Melayu, China, India, negro tauka orang putih.

Engka kelia bisi sekeda sida ke tuai enda tentu tebuka runding enggau ati ngagai bansa bukai.

Bisi meh kebuah iya ti engkeman tang nya cherita ungkup maya enggau endur bukai.

Tang realiti pengidup kemaya hari, ketegal pendiau kitai ke begulai enggau bansa bukai ba sekula tauka ba endur gawa, kitai diatu meda majak mayuh kaban belayan, anak tauka uchu kitai jadi enggau laki tauka indu ari bansa bukai tauka megai pengarap bukai.

Kitai diatu majak suah agi meda orang Melayu, China, India enggau orang putih ba rumah panjai kelebih agi maya ngintu gawai.

Ba siti rumah panjai di Kanowit, bisi lelaki ari Thailand jadi enggau indu Iban dia lalu diau mendam dia.

Pelaba aku, pekara ti baka nya enda agi nyelai dipeda kitai di Sarawak.

Peranak rumah panjai mega udah nemu bebasa ke temuai. Ambi ke chunto, jarang amat kitai diatu meda temuai ditumpil tauka dipejal ngirup tuak.

Aku ingat ke diri empu kala ditumpil dua indu dara ke enda dikelala aku ngirup tuak segayung maya manggai bujang suba!

Pia mega diatu, enti bisi orang Melayu nemuai, kitai ngenah ke sida pemakai sereta ai irup ti tau diempa enggau diirup sida.

PENYERAKUP BEPUN DI RUMAH

GAP… Bala lelaki gap dipeda ngerasuk pekayan asal kitai Iban.

Lebuh bejadi Minggu Penyerakup Menua Renggat Nasional di Waterfront Kuching kena 21 Mei empai lama, Yang Di-Pertuan Agong Al-Sultan Abdullah Ri’Ayatuddin Al Mustafa Billah Shah madah penyerakup endang reta menua ti pemadu berega dudi hari.

Ku iya, penyerakup bepun ari rumah lalu rayat patut nyeliahka diri ari betalatka bida enggau pangan diri ngambi seraka kaul entara peranak pupu bansa enggau pengarap meruan dikedut.

Sarawak diberi basa ngatur Pengawa Bejadi Minggu Penyerakup 2023 ari 20 ngagai 28 Mei (ensanus) ke mega dipejalai ba 15 bengkah endur ba selampur menua, berambai ke leka jaku ‘Perpaduan Dalam Kepelbagaian’ tauka Penyerakup Dalam Bemacham Bida.

Minggu Penyerakup diatur ngambi narak penyerakup sereta ngerembaika penemu, pemereti enggau beratika penyelai adat sereta main asal dalam komuniti Malaysia.

Juluk tu mega tau nyadi malin dikena narak penyerakup ba rumah panjai.

BADU BELAYA NGARI ORANG BUKAI

Enti kita nemuai ngagai rumah panjai indai aku, anang tekenyit kita enti kita meda sida serumah ke ngena baju Pakatan Harapan (PH), baju Gempung Parti Sarawak (GPS) enggau baju Parti Sarawak Bersatu (PSB) benung berandau di ruai.

Nya tanda ti manah laban iya nunjuk ke sida serumah nadai laya politik, semina bisi bida ideologi tauka penemu politik.

Pelaba aku, pekara tu mega bisi dipeda ba rumah panjai enggau menua bukai.

Munyi ku orang putih, sida agree to disagree (setuju enda setuju).

Reti iya, aku bebasa ke penemu enggau pengarap nuan taja pen iya bebida ari penemu enggau pengarap aku, tang bida nya enda ngachau kaul manah entara tua.

Maya pengawa bepilih ba taun nyin kemari, kitai bendar amat belaya ngari orang bukai ke enda dikelala kitai.

Kitai engka nyukung sida laban sida ngembuan ideologi ti sebaka enggau kitai.

Tang diatu, semua laya, penemu enggau ideologi politik nya enda dikeibuh agi laban pekara ti pemadu beguna enggau besai agi reti endang penyerakup sereta pemanah kaul.

Aku kala niki rumah panjai ke bisi ruai ti besapat laban tuai rumah enggau menyadi iya belaya ketegal bida penemu politik.

Ruai ditutup enggau sapat lalu menyadi tuai rumah nya nyiri diri nyadi tuai rumah ba setak ili.

Kitai belaya enggau bala diri sebilik sereta bala kitai serumah ketegal orang bukai ke dikumbai kitai ngemerat ke pengelantang kitai.

Ujung iya, sida ke belaya nyadi kaban tang kitai serumah nyadi munsuh.

GAWAI NGERAPIT KAUL

Taja pen pemansang dunya udah ngubah mayuh pekara dalam pengidup orang Dayak, tang agi mayuh kitai agi ngemeranka pengarap, adat enggau main asal.

Bisi mega sekeda peranak Dayak ke udah megai pengarap bukai lalu enda tentu nemu pasal adat bansa diri tauka main asal baka ngajat ti ulih dipelajar kitai enti kitai bisi pengingin.

Taja pia, semua kitai enda tau enda ngembuan siti adat ti nanggam semua kitai nadai ngira sapa kitai, iya nya adat pengerindu.

Aram meh kitai pulai ke menua asal kitai enggau ati rindu, mulaika pengerindu kitai seraya ngerapitka agi kaul kitai enggau bala kitai sebilik sereta serumah.

Ampun meh pangan diri enti sema kitai bisi laya lama lalu minta ampun meh enti kitai bisi salah enggau pangan.

Buai ulah ti enda manah lalu bebakih sereta bekaban meh enggau semua orang.

Enda ngira nama pengarap, adat enggau main asal ti dikemeran kitai, siti aja pekara patut dikembuan kitai maya ngintu gawai tu, iya nya pengerindu.

Aku besampi ke semua kitai gayu guru, gerai nyamai, kaya raya, lantang senang nguan menua.

Munyi ku jaku ke suah didinga aku ba radio Iban maya agi biak suka, rindu rindu meh selalu.

Selamat Gawai Dayak!

Suka artikel:

e-Akhbar Suara Sarawak

Berita Berkaitan

E-Paper

22 September 2023

Berita Terbaru