SARATOK: Semangat talukka menua patut diterenak kenyau ari umur biak lalu teladan tu patut diayanka sida ke tuai.
Tuai Rumah Beliang madah, sebarang pengerami ngaul semangat talukka menua endang patut disukung ngambika kitai ulih nempa rebak ti nemu bebasa enggau temegahka menua sida.
Iya mega andal, rayat ba sitak Parlimen Saratok kelebih agi sida serumah nemu reti pemesai guna ulah bebasa enggau bebatak asur sereta lurus ati lebuh begulai idup dalam pengelain ti nyadi kelai kitai.
Tuai Rumah Beliang mansutka jaku tu rambau Program Ngintu Bulan Kebangsaan Begulai Enggau Opis Pemadah Saratok ba Rumah Beliang Beti, Sungai Raba, Budu di Krian ditu, lemai kemari.
Ngelansa pasal pengerami sehari nya, pengawa nyirap kek kelai ngintu Hari Kebangsaan diuluka pemesai ari Opis Pemadah Saratok, Jane Chua disempulang Tuai Rumah Bansang, Tuai Rumah Jamoh enggau Lay Reader Jangan sereta iya empu.
Kelimpah ari pengawa ngitau Jalur Gemilang ke nyadi batang pengerami, pekit main takraw enggau program nyuaka bantu tusu ngagai bala anak mit mega bisi diatur lalu program tembu enggau serumpu makai lemai.
Iya ngarika sida serumah meri besai terima kasih ngagai Menteri Pengeluar Kuasa enggau Pengeraja Asal ke mega Kaban Parlimen Saratok, Ali Biju ti udah melanja program diatur ba rumah panjai sida sehari nya.
Nambahka nya ku iya, terima kasih besai mega ngagai raban ari Opis Pemadah Saratok betuaika Jane Chua ti udah milih rumah panjai sida endur ngatur pengerami serak tu.
Berebak enggau nya, Jane ngarika sida sebuat meri besai terima kasih enggau muji pemanah basa rayat Rumah Beliang ti udah kiruh ngelalu penatai enggau ngintu pemakai ke sida sehari nya.
“Rindu meda bala anak mit, nembiak enggau sida ke besai tuai bela mantaika pengagit diri ngintu Bulan Kebangsaan tu lalu 16 September kitai deka ngintu Hari Malaysia, hari ngingatka menua Malaysia ditumbuh 57 taun ke udah.
“Ari nya aku meransang semua kitai nadai ngira dini alai, baik nya di mengeri, di pasar, rumah panjai tauka nyembuah, sama ngitang tambai Sarawak enggau Jalur Gemilang nunjukka semangat kitai ngintu hari besai menua tu,” ku iya.
