SIBU: Pengerami Sibujaya ulih nyadi produk dagang temuai dikena mantaika Sibujaya ngagai bala pengusung ari luar Sibu enggau Sarawak.
Chairman Kaunsil Pelilih Menua Pesisir Sibu, Kaunsilor Sempurai Petrus Ngelai mega madah, Pengerami Sibujaya nya ulih nyadi siti produk dagang temuai ba Sarawak kelebih agi ba Sibujaya.
Ungkup penerang, Pengerami Sibujaya 2023 nya nyadi renggat kelima pengerami nya sekumbang ditumbuh ba taun 2017 sereta dilanjar dua taun ba taun 2020 enggau 2021 ketegal pandemik COVID-19.
“Taun tu mai reti ti besai ngagai kitai laban Pengerami Sibujaya berengkah diatur begulai enggau pengawa ngintu Hari Malaysia kena 16 September tu tadi,” ku iya.
Sempurai mansutka jaku nya rambau bejadi Pengerami Sibujaya 2023 ditu, empai lama.
Iya madah, bepelasar ke konsep pengerami, mayuh aktiviti manah udah diperambu berengkah ari 16 September nyentuk 8 Oktober tu.
Ku iya, nya nyengkaum Pekit Ratu Etnik Sibujaya, Pekit Pocho-Pocho Kreatif, Pekit Ngias Kek Mangkuk, Kelas Tango, Pengawa Ngerejister Kenyalang Gold Card, Bantu Khas Orang Tuai sereta Pekit Dart ti mujur narit ati penyereta ari Brunei masuk pekit nya.
“Entara aktiviti ti bisi diatur ba hari kepenudi Pengerami Sibujaya (7 Oktober) baka Sibujaya Semi-Marathon, Pengerami Ai sereta Konsert Pengerami Sibujaya 2023 ti disadang digulu Premier Sarawak, Datuk Patinggi Tan Sri Abang Johari Tun Openg.
“Ngelansa senentang Pengerami Ai, kitai deka nempa pengerami tu richah agi baka Pengerami Ai Songkran ba Thailand dikena mata mayuh temuai ari dalam enggau luar Sarawak,” ku iya.
