Pengerami Simunjan deka diatur 6-8 Sept

KOTA SAMARAHAN: Pengerami Simunjan deka diatur tiga hari berunggu berengkah 6 nyentuk 8 September di Pasar Simunjan.

Kenu ku Adun Simunjan, Awla Dris, bemacham aktiviti udah dirintai baka karaoke, lumba perau enggau ke bukai.
“Pengerami tu deka ngangkat pelilih Simunjan nyadi palan ditapatka temuai enggau lumba regata di Sarawak.

“Tu mega deka nyendiaka peluang dagang enggau mantaika bemacham asil betanam ari menua tu kelebih agi buah,” ku iya.

Iya mansutka jaku tu rambau aum pengarang berita ditu, kemari.

Ku Awla, ngemanjaika tesau ngagai mensia mayuh pasal Pengerami Simunjan tu, sida ngatur pengawa ngelaku enggau naburka jaku tesau kandang dua bulan tu nengah media rama kelebih agi Facebook.

“Kitai nagit 100,000 pengusung nedat Pengerami Simunjan ila laban pelilih menua tu diatu muntang dilawa nengah jalai darat.

“Pelilih Simunjan disambung ngena tiga jalai besai iya nya jalai lama Simunjan-Kuching-Sri Aman (176km), jala mengeri Kuching-Serian-Gedong-Simunjan (88.6km) enggau jalai nengah Batang Sadong (97.5km),” ku iya nerang.

Setipak enggau rambai jaku ‘Segulai Sejalai’, Pengerami Simunjan nyadi palan ngempuru pupu bansa, ku Awla.

“Kitai mega nagit penatai rayat ari pelilih bukai, nyereta sebarang aktiviti ti diatur.

“Kepala Menteri, Datuk Patinggi Abang Johari Tun Openg disadang datai bejadika pengerami sekali tu,” ku iya.

NESAU… Awla Dris bejaku ba aum pengarang berita Pengerami Simunjan di Kota Samarahan kemari.