Pengeran ati mai Angela mujur

BINTULU: Sempama baka tekura enggai enda tepantup di bandir ngenyemaka pengeran ati peranak ari Lemanak, Lubok Antu, mansang ba dagang produk pemajik gamal.

Angela Anne Awal ngepunka singkang diri ari embing enggau peransang bala bakih ti udah dulu mujur ngaul diri ba dagang nya.

Taun 2019 nyadika pengingat manis ngagai indu bajik benama Angela laban mujur tejualka produk penyampau RM110,000 ungkup taun tu aja.

Ku iya, dagang produk ngena chap DE ANGELZ ditumbuh kena 2 Oktober 2018 nya nerima mayuh peminta kelebih agi sida ti angkunka pengawa nganta, ngintu pemajik gamal enggau nyaga pengerai kulit mua.

“Enti deka mujur ba semua pengawa, kitai meseti bisi pengeran. Nadai milih pengawa ti dikerindu, asal mih ukai semina duduk, nganti aja nganti orang nulung, nyuap kitai.

TULANG BELAKANG… Tim DE ANGELZ ti mayuh meri sukung ngemujurka dagang sida nerima setipikit sereta dirami malam nya.

“Anang mayuh dalih enti deka mujur laban semua nya ngayanka pengelemi kitai lalu pengawa deka tejanggal laban ati nadai pengeran,” ku iya lebuh dirandau Suara Sarawak.

Nangkan nya ku Angela, nadai utai ba dunya tu lari ari sebarang pemar, penanggul enggau penekul lalu kitai enda ulih nyeliahka diri ari semua leman tu ba pengidup.

Nya alai, Angela bendar meransang diri nitihka singkang orang bukai taja iya suah asai deka mantul, nikal sereta putus pengarap.

“Nasip enda bisi bala bakih meri peransang lebuh aku puntan penemu, ngambika aku angkat baru, berundingka pemayuh utai udah dikereja dataika tikas tu.

“Aku suah nyebut jaku tu dalam ati diri, enti sema orang bukai ulih, nama kebuah kitai enda ulih?

“Ukai semua orang ke udah mujur ba pengidup nya senang, tang sida ngeringka ati ngambika seruran mujur. Nama kebuah kitai enda ulih neladan pengeliat ati sida ke udah mujur nya,” ku Angela.

Iya mega ngaku dunya dagang tu baka ai bisi pasang surut, nadai jamin semua utai dikingin ulih magang, nya alai iya semampai nyikap diri ngena penemu baru kelimpah betanya ngagai orang ngembuan mayuh agi peneleba.

Taja pia ku iya, kitai anang mudah anyut ditabanka ai surut, tang patut pajakka bekayuh nanjak enggau ngelaban arus deras lalu kitai deka ulih ngelaban semua penguji.

Ngelansa pasal Pengerami Makai Lemai Genap Setaun DE ANGELZ udah ditumbuh ba sebuah hotel ditu apin lama ke udah, Angela meri besai terima kasih ngagai semua bala ke bisi datai nyukung pengawa sida sehari nya.

Angela chukup temegah ati nerima penatai Rabia Juti, siku ari ketuai ti mayuh mantu DE ANGELZ mansang ba dagang produk pemajik gamal nya.

Kelai ngenang jasa Rabia, Angela enggau tim DE ANGELZ iya udah meri sagu ati penyampau RM1000 seraya siku pedagang produk pemajik, Cecelia Lagak mega nerima tepa ari sida.

Sama datai apai Angela empu, Awal, Alhadi, Tuai Rumah Thomas, pengari Datuk Talip Zulpilip, Shamsudin Abdul Razak sereta bala ke bukai.

Suara Sarawak