REBAK biak diperansang nampung pelajar datai ba tikas PhD laban bansa kitai Iban udah jauh tinggal ari bansa bukai senentang pemayuh tubuh ngembuan PhD.

Prof. Madya Dr Bromeley Philip, siku pengelicha ba UiTM Sarawak ngelalau bala nembiak ransing agi ngiga penemu datai ba tikas tinggi.

Iya pechaya, pelajar ulih ngubah pengidup kitai menyana agi lalu ulih nyingkang nuju pemujur sebaka enggau orang bukai.

“Aku ngarapka bala nembiak rindu belajarka enggau ulih nguasa jaku English laban tu jaku dikena dunya,” ku Dr Bromeley meransang bala nembiak.

PERANSANG

Lebuh bekenangka pemujur siku-siku, udah tentu bisi orang meransang tauka nyadi chunto ngambi nempa pemujur ke sebaka.

Nya kebuah, Dr Bromeley madah orang ke balat nyadi peransang nya nampung pelajar iya nya Prof Cecelia Ahmoi Essau.

“Nyadi, Prof Cecelia Ahmoi Essau tu kena pangkat ibu aku, betunggal dua kali enggau indai aku.

“Prof Cecelia tu siku ari Professor of Psychology ba University of Roehampton, London, England.

“Iya mega dikelala serata dunya laban suah dikangau meri licha pasal bidang nya ba palan pelajar tinggi.

JALAI PENGIDUP

Dr Bromeley tu ada kena 16 September 1968 di Sibuti, Miri lebuh apai iya ngajar ba RH Essau Primary School, Tiris, Sebuti.

Haribulan Dr Bromeley ada senutuk enggau Hari Malaysia ditumbuh ngujungka hari pengada iya bisi reti enggau penyelai.

Dr Bromeley tu asal ari menua Rimbas Ulu enggau Rimbas Ili, ari Rumah Panjai Budak (penatai Apai iya) enggau Rumah Panjai Nanga Ulai (penatai Indai iya), Debak ba Bagi Menua Betong.

Iya lumur tiga ari lima iku diri menyadi, lalu sida mega bisi ngiru siku menyadi pengkuan nya alai sida bisi lima iku diri menyadi.

“Aku besekula ba Sekula Sekondari (SMK) Lubok Antu ari Pom Satu nyentuk Pom Tiga.

“Udah nya, aku besekula ba SMB St Thomas, Kuching ari Pom Empat ngagai Pom Enam.”

NYULUT BA PELAJAR

Iya mega mujur bulih pemutus peresa MCE pemadu manah ba kelas sastera lebuh besekula ba St Thomas.

Penyulut ba peresa MCE ngujungka Dr Bromeley dipinta JPA ngambi Program GCE A level ba Sekolah Menengah Sains Selangor, Cheras disadang ngambi bidang Undang-Undang ba United Kingdom.

“Taja pia, aku ngemaduka diri ari program nya laban niang indai aku sakit raya lebuh nya,” ku Dr Bromeley berasai sinu enggau puang ditinggalka tiang sukung ba pengidup iya.

“Lebuh ditinggang penusah nya, aku pulai ke Sarawak lalu nampung pelajar Pom Enam ba St Thomas Kuching.

Udah nembuka pelajar STPM, iya bulih nampung pelajar ngagai Universiti Kebangsaan Malaysia (UKM) ngambi English Language Studies.

Pengudah mujur bulih Degree dalam English Language Studies, Dr Bromeley lalu diambi Institut Teknologi MARA (diatu UiTM) nyadi pengelicha English bepun ari taun 1992 nyentuk diatu.

RANSING NGIGA PENEMU

“Udah mujur bulih Degree, aku ngambi degree BA Hons in English Language Studies ba UKM pengelama empat taun dalam bidang TESL.

“Aku dipelanja UiTM nampung pelajar ngambi Master Degree (MSc in TESOL) ba University of Stirling ba Scotland, United Kingdom pengudah tiga taun nyadi pengelicha ba ITM (diatu UiTM).

Ngelansa silik, iya nembuka Master degree nya pengelama setaun lalu pulai baru nyadi pengelicha ba UiTM Sarawak.

Iya mega bisi nembuka Master in Training & HRM ari University of Leicester, United Kingdom.

Pengudah nembuka pelajar Master, Dr Bromeley nampung pelajar PhD dalam bidang Metacognition in Language Learning (Applied Linguistics) ba taun 2000.

“Lebuh nampung PhD ba taun 2000 suba, aku dipelanja Biasiswa Tunku Abdul Rahman (TAR) Yayasan Sarawak ba UKM.

“Lebuh nya, aku nyadi pengelicha UiTM keterubah diberi Yayasan Sarawak Biasiswa TAR ngambi PhD lalu mujur nembuka PhD dalam taun 2004 enggau konvokesyen ba taun 2005,” terang iya seraya tuchum mulaika kenang suba.

Ari sukut pejalai iya ngiga penemu, kitai nyata meda Dr Bromeley tu nyata endar orang ti angkun enggau rindu ngiga enggau nambahka penemu diri.

Diatu, iya baru berengkah ngambi PhD kedua iya dalam bidang Undang-Undang ba Faculty of Law, UiTM.

RINDU MANSIK

Lebuh dirandau, Dr Bromeley madahka iya bejalaika pansik senentang chara ngena jaku English enggau betul sereta chara belajarka jaku English enggau lanchar.

“Ari pansik tu, aku kala bejalai ngagai sekula menua pesisir ngambi nerangka pansik tu.

“Dia aku kala meri licha ngagai bala pengajar English sereta nyadung bup grammar ungkup dikena nembiak sekula menua pesisir.

“Bup grammar tu ulih dikena bala nembiak sekula ngenegap pengelandik sida ngena jaku English,” ku iya nerang sentang pansik enggau chara mantu nembiak sekula.

Bekaul enggau pengawa mansik, iya udah besaup mansik bidang jaku English begulai enggau Universiti Petronas, UKM sereta Unimas.

Kelimpah ari nya, Dr Bromeley mega bejalaika pansik ngemansangka Jaku Iban, ngangkatka reti jaku English ngagai Jaku Iban kelimpah besaup mansik pekara tu enggau Institut Pengajian Borneo, Unimas.

Ngelamatu, Dr Bromeley endang balat bejalaika pansik ngangkatka Urup Iban ti ditengkebang niang Dunging Anak Gunggu.

“Urup tu udah dipasuk dalam software ti dikumbai Laser Iban Software lalu ulih dipasang dalam komputer dikena naip dalam format Microsoft Words,” terang iya pasal Urup Dunging nya.

LIAT ATI

Lebuh nampung pelajar, kitai deka napi mayuh penguji enggau penanggul ngambi ulih nempa pemujur.

Baka nya mega enggau pejalai Dr Bromeley lebuh nampung pelajar dataika tikas PhD ke diatu.

“Mayuh pemar ditapi lebuh nampung pelajar nadai ngira ba tikas Degree, Master tauka PhD,” ku Dr Bromeley bekenangka pengingat nampung pelajar.

“Entara pemar ditapi iya nya lebuh begigaka topik ti engkeman dipansik dalam pansik tesis.
“Tang, aku berasai lantang ati laban mujur nembuka pelajar datai ba tikas ke diatu.

“Puji Tuhan, aku berasai gaga laban bai ati keran enggau ransing nembuka pelajar nyentuk tikas PhD,” ku Dr Bromeley tuchum gaga.

Dr Bromeley tu nyata endar rindu ngiga penemu pengudah iya mujur bulih Anugerah Tesis PhD Pemadu Manah mewakili Fakulti Sains Sosial dan Kemanusiaan taun 2005.

Kelimpah ari nya, iya graduet PhD keterubah ari Fakulti nya nerima Anugerah Tesis PhD Pemadu Manah tu.

KENANG MANIS

Berasai rindu mendingka kenang manis Dr Bromeley lebuh nampung pelajar ngagai menua tasik kelebih agi lebuh bekenangka rampa menua, pemanah budi basa orang din enggau tukuh begunan.

“Rindu amat lebuh nampung pelajar ba menua tasik di Scotland laban menua jauh nyelai ari menua asal diri empu.

“Agi belajar suba, suah amat bejalai matau menua Scotland ari mengeri datai ba atas ngagai mengeri Aberdeen.

“Rampa menua Scotland pemadu manah, bebukit dibungkur kampung ke ngembuan bemacham chura daun kayu.

“Nambahka nya, ba menua Scotland mega mayuh astana lama tang semua endang diintu enggau dijaga manah kelimpah nyadi palan pematak temuai ari serata dunya.

“Dia mih aku mayuh begulai enggau nembiak ari menua bukai ba tikas entarabansa.

“Gaya pengidup lebuh belajar ba UKM meri mayuh peneleba ke chukup berega ngagai aku.

“Kebuah pia laban aku ulih betemu enggau macham pupu bansa ari Malaysia enggau Nusantara,” tandu Dr Bromeley.

Nya kebuah, pejalai pengidup Dr Bromeley ngiga penemu datai ba menua tasik patut nyadika chunto ngagai rebak biak anang enggai ngiga penemu datai ba tikas pemadu tinggi.