Joseph Kalang Tie, 34, pemain tengah tim Kuching City FC entara siku ari pemain bol ti pegari nama ba Malaysia sereta dikerinduka mayuh peminat main bol lebih agi ba selampur Sarawak.
Kala digelar “Messi Malaysia” laban chara ia bemain chukup laju disemaka baka pengelaju Lionel Messi, siku pemain tebilang ba dunya ari menua Agentina lalu benung bemain ba Kelab Paris St Germain di Peranchis.
Serak tu Ruai Suara Sarawak sekali agi ngerandau Joseph Kalang Tie ke mega asal ari Long Ikang, Baram di Miri nengah aplikasyen whatsapp laban deka nemu berita pemadu baru ari iya.
SUARA SARAWAK : Tabi ngagai nuan Joseph, nama berita?
Joseph Kalang Tie(JKT): Terima kasih ngagai Ruai Suara Sarawak, berita aku manah.
Mayuh peminat ba luar din tentu deka nemu bakani pun pejalai nuan nyadi pemain bol profesional. Ulih kini nerangka pekara nya?
Pejalai aku nyadi pemain bol profesional berengkah ba taun 2008 iya nya maya umur aku manggai 18 taun. Laban aku chukup minat ba main tu aku lalu terus ngemujurka diri lalu nyadi ka tu batang pengawa tetap aku.
Au manah chukup amat nya. Sapa kini orang ti chukup mayuh meransang nuan nyentuk tejapaika pemujur baka sehari tu Joseph ?
Orang ti semampai nyukung aku dalam pengawa aku tu iya nya bala kami sebilik empu, apai indai sereta bala kaban enggau peminat aku. Nya mih nyadi ka peransang aku tiap kali nurun bemain bol lalu sukung sida ia nyadi pengering semengat aku.
Dalam tim Kuching City, nuan siku kapten ke balat meri peransang ngagai raban bukai. Nama kini pemar ngiring tim tu?
Sekumbang udah ngiring tim Kuching City FC ba aku nadai tentu ngasaika pemar laban bala bakih dalam tim bela meri kerejasama ke chukup manah.
Juluk ati aku taun baru aku deka nyapai pemujur ke lebih manah ari taun tu lalu mai semua pemain baru (biak) dalam tim bemain pengabis manah.
Ya..arapka terus mujur mih Joseph. Nyau nikal ngagai pun randau. Ulih kini bekunsika pengingat nuan sekumbang bemain enggau tim Malaysia taun 2011 suba?
Penginat diasai aku maya bemain enggau tim Malaysia chukup mayuh tang nyau enda ingat agi. Bemain enggau tim Malaysia chukup ngasuh aku temegah ati laban ulih besemekih enggau pemain bukai ke mayuh pengelandik ba ba tikas entarabansa.
Sapa pemain bol sereta tim ti dikerindu enggau nyadi peransang nuan Joseph?
Enti ba menua kitai, aku rindu meda chara siku pemain lama Pahang iya nya Azizul Kamaruldin. Udah nya, pemain luar aku minat Lionel Messi. Pia mega aku siku penyukung kelab Chelsea.
Ulih kini bekunsika pengingat pait enggau manis ti diasai ka nuan sekumbang nyadi pemain bol profesional?
Pengingat pait aku lebuh utai dikedeka aku kekadang enda ulih japai baka alah ba final lalu lenyau menyadi tuai aku ti amat dikesayau ka aku.
Pengingat manis iya nya maya bulih champion Mangkuk FA begulai enggau tim Terengganu 2011 sereta champion Liga Perdana enggau tim Sarawak FA .
Nama juluk sereta pengarap nuan ngagai pemain bul menua kitai Sarawak?
Aku ngarapka mayuh agi pemain bol ari Sarawak ulih dipilih bemain enggau tim Malaysia sereta arapka sida iya nyema udah dipilih ngarika Malaysia, nguna mih peluang nya enggau manah.
Udah nuan ngetu bemain bol ila nama juluk ati nuan Joseph, bisi kini nuan nyimpan juluk deka nyadi jurulatih tauka utai bukai?
Tu bedau ulih aku madah naka ke diatu laban bedau temu lalu beserah mih ngagai Petara ti ngatur semua nya. Arapka semua atur Petara nmai penyamai sereta pemujur.
Nama peransang nuan ngagai bala nembiak ti bisi minat milih pengawa bemain bol lalu nyadi batang pengawa tetap?
Pesan aku ngagai baka nembiak ti rindu bemain bul lalu bisi juluk ati nyadi ka tu batang pengawa tetap,kitai mesti bisi ngembuan pengeransing ati, disiplin ti tinggi sereta juluk ati mesti ka bisi.
Kebuah pia ambi nyadi ka peransang kitai mujur lalu kitai patut bebendar nyapai juluk nya.
Terima kasih Joseph laban udah meri awak berandau enggau nuan, kami Ruai Suara Sarawak seruran nyukung sereta besampika pemujur nuan ngangkatka nama kelab Kuching City ba pekit Mangkuk Malaysia 2021.
Sama-sama. Terima kasih mega ngagai Ruai Suara Sarawak.
