Pengereja kunterik parai dilamun tanah tusur

SERIAN: Siku lelaki bebadi nyawa ba penusah tanah tusur di Kampung Bunan, Jalai Mongkos ditu tadi.

Ku Penulung Sapit Direktor Opis Bomba enggau Penyah Penusah Nengeri Sarawak, Tiong Ling Hii madah, lebuh raban ke dianjung ngesah datai ba penusah nyadi, endang bisi tanah tusur endur ngaga parit tisi jalai genturung pendiau nya.

“Ba penusah nya, bisi siku lelaki dilamun tanah tang mujur dikeluar piak kunteriktor lebuh piak Bomba datai dia pengudah nerima kangau ngenyit urung pukul 9.57 pagi.

“Lelaki benama Nicholas Jawan, peranak asal Kampung Rudan, Rayang di Padawan nya ditukuka piak Opis Menteri Pengerai Malaysia (KKM) Kampung Bunan parai tekala nya,” ku iya ba sebengkah penerang berita ditu tadi.

Nitihka penerang, niang Nicholas tu siku ari pengereja ngaga parit dia lalu niang enda tepadahka nyawa diri pengudah ditinggang semin ti ditabanka tanah tusur.

Piak Bomba udah nya nyerahka bangkai niang ngagai piak polis ngambika atur bukai dipejalai nitihka pematut.

Ba lansa sama, raban ari Balai Bomba enggau Penyah Penusah Serian ti diketuai PBK II Sim Mun Chai enggau PBK I Dominic Girai ngesah ngagai endur penusah nyadi.

Suara Sarawak