Pengerindu lepa betukar nyadi pengawa dagang

KUCHING: Pemuas ke rindu nganyam bakul, Samcia Marcus, 34 taun diatu udah nyual bakul ti dianyam iya.
Pengerindu lepa baka beranyam bakul tu meransang iya ngubah pekara nya nya nyadi pengawa dagang dikena nambahka penatai pemisi ngambi mantu sida sebilik.
“Aku berengkah nganyam bakul tu kenyau ari taun 2015.
“Terubah suba sigi rindu aja nguji enggau orang nganyam bakul laban ke nadai pengawa bukai.
“Aku mega rindu beranyam bakul laban semua kami sebilik ngembuan pengelandik ke sebaka.
“Nya kebuah, aku ngembuan juluk ati deka nyual semua bakul ti udah dianyam nya dikena nambahka anak belanja,” ku indu bansa Penan nya nerang ngagai Suara Sarawak, ditu kemari.
Ku Samcia, iya belajar beranyam ari ibu iya ti endang landik nganyam bemacham bansa produk.
“Terubah aku semina deka belajar beranyam aja ari ibu aku tang nyau pemuas, pengawa beranyam nyadi pengawa dikerindu aku.
“Aku berasai rindu meda asil keranjai diri pengudah bakul nya tembu dianyam,” terang Samcia.

LANDIK… Pedagang bansa Penan, Samcia Marcus, 34 taun landik beranyam bakul.

DAGANG LAKU
Iya mega madahka dagang mit tu nerima mayuh peminta ari bala penguna ba mayuh kandang menua.
“Aku kala nerima udar bakul 100 iti dalam sehari lalu aku deka nembuka anyam bakul nya dalam timpuh seminggu.
“Nya kebuah, aku suah ngasuh bala penguna ngudar tumbu ngambi bakul ti diudar sida tembu nitihka timpuh,” ku Samcia nerang.
Nambahka nya, Samcia berasai gaga laban dagang bakul iya majak laku.
“Udar diterima ninting hari bisi amat ke belanja ungkup kami sebilik,” ku iya ti enda nyangka pengerindu beranyam diatu udah nyadi dagang.
UNTUNG MANGGAI RM5,000
LAKU… Samcia kala nerima udar bakul 100 iti sehari.

“Pengudah Atur Mindah Betagang (PKP) enggau sektor ekonomi dibuka baru, aku besemangat neruska dagang tu.
“Taja apin bisi kedai lalu semina bepanggal ba asil produk ari rumah, aku berasai gaga pengudah meda asil ari dagang tu.
“Pengawa beranyam bakul tu meri mayuh untung kelebih agi sida ke nadai penatai pemisi tetap.
“Sekumbang udah bedagang bakul tu, aku suah untung ari RM1,000 ngagai RM5,000 sebulan.
“Kebuah pia laban produk bakul ti dijual aku tu ukai semina ungkup dikena ninting hari.
“Bala penguna mega suah ngudar bakul tu nyadika derian,” ku Samcia nerang baru.
Peranak ari Kampung Long Latie mega ngarapka dagang iya tu maju agi dudi hari.
Penguna ti deka nemu penerang silik tauka ngudar produk anyam Bakul Penan tau ngelawa Facebook Samcia Craft tauka telefon ngagai lumur 011-25002541.

Suara Sarawak