KUCHING: Pemujur Jaguh Angkat Berat menua, Bonnie Bunyau Gustin bulih midul emas ba Lumba Paralimpik patut nyadi ke chuan bansa kelebih agi bansa Dayak.
Tuai Akademi Serakup Dayak Iban Sarawak (Asadia) Mabong Unggang madahka bepekit ba renggat dunya enggau Paralimpik ukai pekara ti muntang sereta senang laban iya betapat enggau ‘manuk sabung’ menua bukai di serata dunya ti ngembuan pengering enggau disiplin ke tinggi.
“Taja pia, pemujur Bonnie bulih emas ba renggat dunya taun 2018 lebuh iya ngambi bagi ba angkat berat Para Asia Jakarta, emas ba main Angkat Berat Trofi Nursultan 2019, emas ba Trofi Dunya Para Angkat Berat di Bangkok enggau pemadu baru bulih emas ba Paralimpik Tokyo, Jipun.
“Pemujur iya bulih empat iti midul emas ba renggat dunya mandangka, anak Sarawak tu ngembuan pengering enggau disiplin ti tinggi,” ku iya dalam siti penerang media, kemari.
Ku iya, pengeransing ati Bonnie patut nyadi ke chuan enggau teladan nembiak rebak baru enti deka mujur ba semua bidang tauka pengawa sida.
“Bonnie udah mandangka reti ‘enti bansa bukai ulih, bansa aku pan ulih’.
“Dikena malas budi iya udah ngangkatka nama Malaysia, Bonnie sigi endang patut diberi upah nitihka atur upah renggat Olimpik nyengkaum upah iya teulihka midul emas sebedau tu ba renggat dunya.
“Tambah mega, sida Bonnie sebilik endang seruran ngarika Sarawak enggau Malaysia belabuh ari apai iya Gustin Jenang ti kala ngarika Sarawak ba lumba Para Sukma enggau ngarika Malaysia ba pekit angkat berat renggat entarabansa dulu suba (Asean 2017),” ku iya.
Mabong madahka, kelimpah upah ari sukut mata duit enggau reta tengkira, Bonnie mega patut diberi penemu enggau latih ba pengelandik ngatur pengidup awakka iya ulih nyikap diri lebuh udah badu bepekit jemah ila.
