Pengingat musin ngetau

DULU kelia pengawa ngetau entara batang pengawa ke pemadu dikerindu sereta dianti-anti orang ke ngereja pengawa bumai kelebih agi ba raban bansa kitai Iban.

Serak tu, Suara Sarawak mai kitai ngelansa sekeda kenang lebuh ngetau ti ditibak ari laman Facebook – Iban Sarawak Sea Dayaks, ti mayuh bekunsika pengawa asal, adat enggau jerita lama kitai Dayak Iban.

Mulaika kenang kitai ba tikas pengawa bumai, musin ngetau entara pengawa ke pemadu meri penguntung. Asil padi ke mayuh diketau ukai semina meri bekal ke chukup ngagai orang ke bumai tang mega bisi nyadika penabat tauka bekal ba taun dudi.

Maya pengawa ngetau kitai Iban kelia enggau ke diatu mayuh bengkah perengka bisi diguna. Entara perengka ke pemadu beguna iya nya sintung, ketap, tubang, lanji enggau jagung lanji.

ANYAM SINTUNG

BEDURUK GAWA… Gambar diambi dalam taun 2016 lebuh peranak menua Remun/Lebor ngetau padi. Gambar ari Mumy Wulan.

Perengka ke dikumbai sintung iya nya seiti raga ke diguna dikena nyimpan tangkai padi ke udah diketap.

Maya ngetau, sintung deka disangking ba punggung. Gamal sintung lebih kurang sama enggau gamal seluk tang iya besai agi.

Chara ngaga sintung sebaka enggau chara ngaga seluk lalu perengka ke diguna dikena ngaga sintung iya nya rutan.

Rutan ke udah diambi nya deka ditetak enggau dibelah lalu pemanjai nitihka peneka diri. Udah nya, lambar rutan dibelah sereta diraut awakka nyamai dianyam orang indu.

Tebal agi sintung nadai bungai tang chara nganyam iya meseti dikereja enggau betul. Enti salah anyam, gamal sintung nya deka nyelai.

Jeman diatu, orang indu ke agi landik nganyam sintung iya nya sida ke udah tuai-tuai. Enti sema bisi pan nyau jarang mih sida ke biak nemu nganyam sintung.

Enti dulu suba, bala anak indu ke udah angkat dara endang diajar indai sida beranyam laban ke nadai mayuh main bukai dikereja baka jeman diatu, ambis nadai pan nemu nganyam anak tikai.

KETAU JARI

NGETAU JARI… Gambar diambi dalam taun 2016 lebuh peranak menua Remun/Lebor ngetau padi. Gambar ari Mumy Wulan.

Kelimpah ari sintung, perengka bukai ke pemadu beguna maya ngetau iya nya ketap. Seiti pisau mit ke digaga dikena ngetas tangkai padi.

Taja baka nya, mayuh bengkah gamal ketap ke bisi dikena raban kitai Iban ngetau, bisi nya mit, besai enggau panjai tepulai ngagai orang ke ngaga ketap.

Nyema orang ke ngembuan jari besai, tentu ketap ke dikena sida ngembuan mata ke besai. Besi ke dikena ngaga ketap iya nya besi biasa.

Taja pia, penajam mata ketap mengkang dikemeratka tukang kambuh. Ketap ke digaga mit mata begunaka pengelandik ngeraut kayu enggau ngaga tangkai iya.

Sekepin papan mipis diguna nyadika tempat dikena ngelekatka mata ketap. Ketap ke ngembuan mata besai, berasai berat mimit enti dipegai tang tan lama.

Bisi mega mata ketap digaga ari tin lalu chara ngaga iya semina ngempat kerubung tin lalu dilekat ba tangkai ketap.

Bisi sekeda menua ngetau sayat, ngena penyayat ti digaga baka mata penyabit, lalu tangkai padi deka digempung sebedau dipangka ba pemangka ti digaga ari dawai, didinding ngena kimis.

Pemangka tu suah didiri ba tengah tegalan umai ngambi muntang endur orang mangka tangkai padi ti udah disayat lalu leka padi ke udah larah ari tangkai deka diperayar sebedau ditepu dalam kambut sum.

PERISI… Gambar diambi dalam taun 2016 lebuh peranak menua Remun/Lebor ngetau padi. Gambar ari Mumy Wulan.

BESIMPANKA PADI

Jam ngetau, padi ke udah diketau deka disimpan dalam lanji sebedau dibai pulai ke rumah.

Lanji iya nya sebansa raga tang digaga tinggi. Pemesai iya enda tetap laban bisi nya besai lalu bisi mega mit.

Lanji mit dikumbai takar. Sida ke nembiak tebal agi nguna takar lalu orang besai tuai nguna lanji mai padi pulai ke langkau tauka ngagai rumah.

Maya pengawa ngetau, tangkai padi ke udah dikempat disimpan dalam sintung sebedau ditepu dalam lanji.

Pengawa ngesan lanji tebal agi dikereja sida ke lelaki. Sekeda perengka dikena ngaga lanji iya nya rutan sega, wi danan, randau kelait, enggau tali temeran.

Rutan ke udah ditetak deka dibelah sereta diraut. Lambar-lambar rutan ke udah tembu diraut terus dianyam. Pengawa nganyam lanji selalu iya dikereja sida ke indu.

PEMADU BEGUNA… Gamal ketap ti nyadi kereban kena ngetau tangkai padi.

Sebaka enggau pengawa nganyam sintung , pengawa nganyam lanji patut dikereja enggau betul. Penuduk lanji mega bisi empat segi.

Lanji dianyam panjai ke atas lebih kurang semeter. Lanji ke udah tembu dianyam deka dilekatka bingkai besai enggau bingkai mit.

Bingkai besai digaga ari randau kelait ke udah dibelah enggau diraut mipis lebih kurang dua inchi pemesai. Chara ngelekatka bingkai lanji sebaka enggau chara ngelekatka bingkai seluk.

Taja baka nya, sebedau ngelekatka bingkai mit, bingkai besai meseti dulu dilekat. Pengawa ngelekatka bingkai tu dikereja sida ke lelaki.

Bingkai besai tu disebut bengkung lalu dilekat berimbai enggau seiti utai ke dianyam disebut tengkilat.

Lanji ke udah tembu dilekatka bingkai deka dipasang tiang empat iti. Tuju masang batang tiang tu awakka lanji enda mudah tumbang.

Utai bukai ke bela bisi dipeda dipasang ba lanji disebut semayau, ribih enggau kerakau burit.

Semayau digaga ari lambar rotan ke dianyam kira dua sentimeter pemesai. Tuju semayau dipasang ngambika nyamai endur ngelekat ribih lanji.

Ribih iya nya sebansa tali ke digaga ari kulit tekalong. Chara ngema lanji, tali deka dikauk ba kedua-dua piak bahu. Kerakau burit ba lanji lambar rutan ke dianyam lalu dilekatka ba baruh lanji.

Tuju ngelekatka kerakau tu ba baruh lanji ngambika lanji tan. Maya ngangkut padi nguna lanji kelia, sekeda orang nutup lanji ngena seiti utai ke disebut jagung lanji.

Jagung lanji nyadi tipak ngagai lanji lebuh lanji udah penuh. Suah mega dipeda utai ke nyadi jagung lanji tu iya nya guni.

Semua padi ke udah tembu diketau deka diangkut ke rumah panjai. Pengawa tu kelia tebal agi dikereja sida ke lelaki enggau chara beduruk.

KETAU SAYAT… Chara ngetau padi suah dikereja peranak ba menua ili ke alai tangkai padi ke disayat, digempung lalu ditugung sebedau dipangka ba dawai ke udah digaga ba tegalan umai.

NUNGKU, NGERUMAN

Bisi sekeda orang terus mai tangkai padi pulai ke rumah lalu bisi sekeda dulu ditungku ba langkau umai, udah nya baru dibai pulai ke rumah.

Pengawa nungku sebengkah aktiviti ngindik tangkai padi awakka leka padi tingkil ari tangkai. Padi ke udah tembu ditungku deka diruman.

Udah tembu ngeruman, nya baru orang ngereja pengawa muput iya nya ngebuka ampa ari leka padi berisi. Ba pengawa muput, orang indu enggau orang lelaki besaup ngereja pengawa.

Padi ke deka dipuput ditepu dalam baka, udah dituang lalu dipuput tauka dipeributka orang lelaki ngena chapan. Tunga menua Batang Rajang ngumbai pengawa tu berayarka padi.

Tiga iti perengka dikena maya muput iya nya baka, chapan enggau tikai perampan. Baka digaga ari senggang. Sebedau dianyam nyadi baka, senggang dulu dipantap lalu dijembi sampai rangkai. Udah nya baru iya dibelah mit-mit lebih kurang setengah sentimeter.

Chapan dikena ngebau padi, ngebau berau, sereta ulih dikena alai nyembi bemacham utai bukai.

Chapan mega digaga ari senggang. Pengawa ngayam chapan meseti berengkah dulu enggau pengawa ngaga dua iti buchu iya.

Chapan ke udah tembu dianyam deka dipasang bingkai. Bingkai chapan diambi ari wi danan ke udah dibelah dua lalu ditanchang enggau rutan.

Kelimpah ari nya, tikai perampan mega digaga ari senggang dikenya nyembi padi. Tikai perampan tu ulih dikena alai nungku padi, muput padi enggau nyembi mayuh macham utai bukai. Chara ngayam tikai perampan sebaka enggau chara ngayam tikai bukai.

TIBANG PADI

Pengawa ke penudi ba pengawa bumai kitai Iban kelia iya nya naruh padi. Padi ke udah rangkai dijembi deka disimpan enggau memanah ba seiti endur ke dikumbai tibang.

Utai ke disebut tibang tu iya nya utai ke digaga ari kulit kayu enteli. Nitihka penerang sumber, pemesai kayu enteli ke ulih dititi kulit tu kira sepemerap orang tuai.

Kulit kayu ti deka dikerembai awakka besai. Udah nya, iya deka ditempa baka seiti raga besai lalu dikepit enggau kayu sereta dijait ngena rutan.

Tibang ke udah tembu dikepit enggau dijait nya deka terus dibingkai. Semua padi ke udah beresi terus disimpan dalam tibang.

Nitihka penerang mega, padi ke disimpan dalam tibang ulih tan betaun-taun lalu enda nemu jai.

Taja baka nya, bisi mega tibang digaga mit laban deka dikena nyimpan lugu benih. Pemesai iya kira sepemerap orang tuai lalu peninggi iya lebih kurang semeter.

Tibang mit tu semina dikena naruh benih lalu digagaka tutup ari kulit kayu enteli. Padi ke ditaruh dalam tibang deka diambi nitihka penyampau ke diguna sebedau iya dijembi enggau ditutuk nyadi berau.

BERAU BARU

Perengka dikena nutuk padi ba raban bansa Iban kelia dikumbai alu enggau lesung sebedau ke bisi injin padi baka diatu.

Lesung tu sebengkah perengka ke digaga ari kayu lalu bisi ditebuk lubang ba tengah-tengah. Pengawa nyembi enggau nutuk padi dikereja orang indu.

Kelimpah ari lesung, perengka dikena ngulihka berau iya nya kisar. Kisar mega digaga ari kayu lalu bisi mua atas enggau mua baruh.

Mua atas digagaka lubang dikena nuang padi sebedau iya dikisar nyadi berau.

Padi ke udah dituang labuh ngagai mua baruh ke bisi ngembuan gerinjing. Ba mua baruh nya meh, padi dikisar sebedau iya nyadi berau.

Berau ke agi bechampur enggau seku nya deka dikebau ngena chapan. Udah nya baru pengawa milih antah dikereja sida ke indu. Maya tu bala nembiak indu sigi berebut mutik antah seraya ninga sida ke tuai berandau.

Taja baka nya, jeman diatu pengawa kitai Iban ke agi bumai chukup muntang laban udah mayuh perengka moden berindik ari pendiau pengidup enggau gaya menua ke udah jauh mansang.

Enti ngingatka kenang musin ngetau suba, rindu amat asai. Tambah mega enti enggau orang ngetau muakka pagi tauka lemai laban hari nyau lindap, angin mega betekesut.

Semua pengingat tu deka semampai dikenang nyentuk jemah laban dunya jauh berubah, pengawa bumai majak dilengka ketegal bekuli ngiga pengidup sebelah mengeri.

Juluk deka diau mendam di menua lalu ngereja pengawa betanamka buah enggau sayur ba kebun kelimpah ari bumai ungkup ke dempa diri empu pengudah pinchin gawa endang bisi, enti tubuh agi regas enggau gerai sereta umur panjai diberi petara.

Suara Sarawak