TUSUN KEPENUDI

GENAP iku mensia endang deka ngasaika bemacham penguji ba pengidup.

Taja pia, penguji nya deka ngeringka ati ngambi sabar sereta seruran nyikap diri kelebih agi ba dunya dagang baka napi bemacham ulah penguna enggau penguji bukai.

Ba tusun sekali tu, aram kitai sama beratika penguji ditapi Ina Sendar lebuh bejalaika pengawa dagang sereta timbal ari mensia mayuh ngagai produk dagang iya.

ASAM GARAM BEDAGANG

Lebuh kitai bekenang senentang orang dagang, runding kitai lalu tebayangka penyamai pengidup sida laban bisi dagang diri.

Pekara ti suah mansa runding kitai iya nya kitai ngumbai sida orang beduit sereta idup nyamai.

Kala kitai nguji berunding pengasai tauka penguji ditapi sida lebuh ngepunka dagang lalu pia mega pengasai sida naka ulih ngetan sereta ngemansangka dagang diri?

Kebuah pia laban kitai semina ngelala sida lebuh sida udah manggai ba tuchung pemujur.

Tang lebuh sida teterap tetingkap tauka tesungkur maya ngepun sereta ngetanka dagang, bisi kini kitai meda sida napi semua nya?

Napi bemacham penguji nya endang udah asam garam ba pengawa dagang.

Nya alai, mayuh orang dagang ngetu ba tengan jalai lalu mantul ketegal nadai ngembuan pengeliat ati nempuh semua penguji besai nya.

Baka nya mega pejalai dagang INA Sendar Creations sigi enda kala pungkang napi bemacham penguji.

Ina madah, sekumbang ngepunka dagang ba taun 2018 suba nyentuk diatu mayuh penguji enggau penanggul udah ditapi iya.

“Aku suah dikeduan bala penguna ti enda beradat. Sida ngudar produk ari aku tang lebuh produk tu udah datai ba sida dia deh sida lalu enda mayar aku.

“Pekara tu suah amat nyadi ba aku lebuh keterubah bejual suba ngujungka aku napi pengerugi ketegal ulah sida.

“Bula madah diri enda asa nerima tauka tetemuka penguna baka nya tang nya mih penguji ti mesti diasaika penguna taja pen aku naka ulih nyendiaka produk bekualiti, enggai ngelebu sida.

“Lebuh tekenangka peneleba tu, ati aku sinu ngenang nasip diri laban kelalu pechayaka bala penguna sereta ngumbai sida lurus ati.

“Endang amat munyi ku sempama ti madah, buk sama chelum tang bedau tentu ati sebaka.

“Pia mega, aku suah tekenaka bala penguna ti enda beamat-amat deka meli produk aku.

“Keterubah sida madah keran deka ngudar tang ba jam kepenudi, sida lalu nginsil udar diri,” ku iya nusui sebana diri.

Baka dagang bukai, dagang Ina mega enda tinggal nerima empas ari pengerekai penyakit Covid-19 enggau Atur Mindah Betagang (PKP) ti terit dipejalaika perintah lebuh nya.

Penusah nya ngujungka dagang Ina kusut lalu peminta bala penguna pen kurang.

PENELEBA BEREGA

Pekara ti nyadi nya meri siti peneleba ti chukup berega ba Ina.

Kebuah pia laban peneleba nya ngajar iya mayuh pekara ba pengawa dagang.

“Genap penguji enggau pemar tu ngajar kitai ngambi kering sereta liat ati nempuh bemacham penguji ti datai nuntung dudi hari.

“Anang kitai jampat mantul ati lalu nyerah alah lebuh dituntung bemacham penguji tang perening meh pekara tu ari sukut manah.

“Pechaya meh, anak raja enggau mata panas deka manchar tampak pengudah ujan. Rambai jaku tu suah ditangkin aku nyadika lalau diri.

“Laban aku pechaya penguji tu nyikap aku nerima pekara manah ba mua ti udah disediaka Tuhan,” ku padah Ina.

Peneleba nya ngajar iya ngambi bejimat lebuh nerima udar ari bala penguna dikena nyeliah pekara ti enda manah nya nyadi baru.

DIKERINDU BALA PENGUNA

Taja napi mayuh asam garam tang dagang INA Sendar Creations nerima timbal manah ari bala penguna.

Pengelebih teknologi digital kemaya hari beguna bendar dikena ngelaku produk dagang ngambi dikelala mensia mayuh.

Nya alai, iya mantaika produk dagang diri nengah bemacham pelasar media rama baka Facebook, Instagram, enggau WhatsApp.

Pia mega, Ina ngena pelasar media rama nyual produk kraf jari kelimpah bejual ba palan bedaja lebuh bisi pengerami tauka program diatur perintah enggau Gerempung Ukai Dikuasa Perintah (NGO).

Berengkah ari nya, dagang iya majak dikelala mensia mayuh lalu enda ngetu nerima peminta ari bala penguna.

Pemanah, penyelai enggau pengalus asil kraf jari leka marik digaga Ina ti dibantai ba sebelah media rama mujur narit ati bala penguna ari selampur menua Malaysia.

Ukai naka nya aja, produk kraf jari nya bela dikerindu bala temuai ari menua luar sekumbang adan menua udah dibuka.

Sida muji sereta tepantup ati meda asil keranjai jari iya lalu ngudar produk dikerindu diri.

Nya alai, ba taun 2019, dagang Ina majak ngerembai sereta enda ngetu nerima peminta ari bala penguna.

Peminta bala penguna ti majak nambah nya ngujungka iya enda tetangkupka peminta nya kediri.

Ari nya tadi, iya ngaji sekeda pengereja pengawa ngambi bisi mantu iya nangkup peminta bala penguna nya.

“Sida mantu aku ngaga bemacham kraf jari leka marik ti diudar bala penguna kelebih agi marik empang.

“Enti dibanding enggau produk kraf jari leka marik ke bukai, marik empang tu meh chukup lama digaga iya nya urung tiga bulan baru ulih tembu penuh.

“Aku beterima kasih ke pengiruh enggau pengeransing sida mantu aku.

“Nya alai, dikena aku masa sereta ngenang budi sida, aku meri sida tepa ngambi sida ransing agi gawa,” ku tusui Ina seraya muji tim diri.

JAKU PERANSANG

Ngena peluang tu, Pemungkal INA Sendar Creations bela ngelalau mensia mayuh ti ngaul diri ba pengawa dagang ngambi enda leju belajar.

“Anang sekali kitai ngetu belajar taja kitai bisi ngembuan degree ari palan pengajar tinggi laban tu enda nyamin kitai nemu semua utai.

“Lebuh kitai ngaul diri ba pengawa dagang, kitai patut belajarka mayuh pekara dikena nyikap diri ngambi mujur baka orang bukai lalu ninting hari mayuh pekara baru ulih dipelajar kitai.

“Taja pen aku landik ba pengawa ngaga kraf jari leka marik tang tu ukai mai reti aku enda belajar ari orang bukai.

“Aku suah ngambi bemacham kus enggau kelas bekaul pengawa tu dikena nambah penemu diri kelimpah belajar kediri nengah media rama baka Facebook enggau YouTube.

“Pia mega, aku bela ngajar sereta bekunsi penemu enggau orang bukai.

“Ukai naka tu aja, kitai patut nemu pekara bekaul pengawa ngelakuka produk, ngira ungkus, ngaul penguna enggau ke bukai dikena kitai beretan ba dunya dagang,” ku lalau iya.

Iya mega meransang bala indai ti gawa ngintu ruang bilik enggau indai tunggal ngambi ngaul diri ba pengawa dagang dikena nyungkak penatai pemisi tambah ngagai ruang bilik diri.

Ku Ina, semua orang kelebih agi orang indu endang bisi ngembuan pengelandik kediri empu sekalika ba pengawa ngaga kraf jari, nyumai, bekebun, bejait, beranyam, ngaga kuie enggau ke bukai.

“Nya alai, kemansangka meh pengelandik tu dikena bedagang ngambi kitai ulih ngubah sereta ngangkatka tikas ekonomi ruang bilik diri.

“Anang malu ngepunka pengawa dagang lalu bechunto sereta neladan sida ti udah mujur ba pengawa tu.

“Tu mega siti ari juluk Perintah Sarawak ngambi orang indu bumiputera mayuh ngaul diri ba pengawa dagang sereta nyendia bemacham inisiatif dikena mantu raban tu.

“Pia mega, ba pengawa dagang, anang sekali kitai mending penemu orang ti deka ngelabuhka kitai lalu anang mantul napi mayuh penguji.

“Kitai anang malu betanya ngagai sida ti bepenau laban enti kitai malu betanya, kitai deka tesat jalai,” ku iya.

Lebuh dirandau senentang perambu iya dudi hari, Ina madah, iya deka ngemansangka dagang diri ngagai tikas ti besai agi sereta ngembuan kedai enggau chap dagang kediri empu.

Iya ngarap dudi hari iya ulih mantai kraf jari pupu bansa Sarawak nya ngagai menua luar ngambi dikelala ba serata dunya sereta nampung penemu nya ngagai nembiak rebak baru ngambi main asal nya enda lenyau disegang pemansang.

Mensia mayuh ti deka nemu silik senentang produk INA Sendar Creation diperansang ngelawa Facebook: INA Sendar Creations enggau Facebook bebayar, Instagram: ina_s_na tauka betanya terus ngagai iya nengah WhatsApp ba lumur, 016-8793545.