ARTIKEL

Ladang agrovoltaik lebih meruan sereta ngelimat kos ba pengawa betanam betupi.

Pengulih kuasa beresi enggau komoditi karbon

Facebook
Twitter
LinkedIn
WhatsApp
Telegram

BERAPA hari ti udah, PETRONAS Chemicals Group Bhd (PCG) bisi madahka diri udah nyain Sempekat Pemereti Ati (MoU) enggau Sarawak Petchem Sdn Bhd ti diempu Perintah Sarawak.

Kededua kompeni nya deka begulai bejalaika tungkap dikena ngenukuka pengulih ngaga kilang urea enggau ammonia ti ulih ngasilka mimit karbon.

Kilang metanol baru di Sarawak disadang ngasilka metanol semak dua kali ganda mayuh agi ari PETRONAS Chemical.

Pekara ti dibantai nya nyukung siti ripot ba surat berita The Edge kena Hari Dua minggu tu tadi ti madahka Petroliam Nasional Bhd (PETRONAS) enggau Perintah Sarawak deka nyain sempekat renggat keterubah dikena ngemuntang randau sereta nisih pengulih pengawa ngereja projek nya.

PETRONAS enggau Perintah Sarawak merambu numbuh dagang kunsi ba pengawa ngaga kilang ammonia biru ti besai ba nengeri tu lalu dipelaba beungkus urung AS$1 bilion (RM4.8 bilion).

Ba sebengkah penerang begulai kena Hari Tiga minggu tu tadi, PCG madahka kededua kompeni nya deka begulai bejalaika pansik silik bekaul sukut teknikal enggau komersial kelimpah sukut bukai.

Nya dikena napi peminta ti majak nambah ba kuasa beresi enggau ngena kuasa ulih dikena baru tauka ‘renewable energy’ (RE) ba rantau tu.

Ku Premier Sarawak, Tan Sri Abang Johari Tun Openg ti ngemata pengawa nyain MoU nya, kilang nya ila disadang bisi pengulih ngasil ammonia enggau mimit tapa kaki karbon (carbon footprint).

Nya siti inisiatif strategik ba pengawa ngena peluang ti endang bisi ba makit pengawa ngalih kuasa ba dunya.

Ku Chairman Sarawak Petchem, Tan Sri Amar Abdul Aziz Husain, nengah kerejasama nya, kededua kompeni nya ulih nguna sinergi, ngurang ungkus sereta bekunsi pemar entara Sarawak enggau Malaysia.

Inisiatif pemansang begulai nya ulih nyungkak pemansang ekonomi ba Sarawak seraris enggau Strategi Pemansang Pengudah COVID-19 (PCDS) Sarawak 2030.

Direktor Pengatur enggau Tuai Pegawai Eksekutif (CEO) PCG, Mazuin Ismail madahka projek nya bisi pengulih nyadi projek mimit karbon keterubah PCG.

Kerejasama PCG enggau Sarawak Petchem ulih ngemuntang pengawa PCG tama ba makit urea ba Asia Tenggara.

Kelimpah ari nya, kerejasama nya mega meri peluang ngena pengeraja RE ti bisi ba Sarawak seraya ngamat pangku pengawa PCG ba pemansang fasiliti nangkap enggau nyimpan karbon.

Ammonia mimit karbon mayuh diguna ba sektor hidrogen enggau sektor kuasa ba pengawa ‘co-firing’ enggau ‘bunkering’.

‘Co-firing’ siti pengawa nunu dua bansa minyak api (fuel) ba siti sistem nunu (combustion system) lalu suah dikena nunu minyak api baru ba kilang ti endang udah lama bisi.

Pengawa nya dipelaba mudah agi tauka siruka rampa menua.

‘Bunkering’ siti pengawa ngisi kuntina minyak api ba kapal tauka pengawa ngisi minyak api baru.

Urea tebal agi dikena ngaga sum, utai mata dikena ngaga resin ba papan lapis enggau pelekat kelimpah utarat eksos diesel (diesel exhaust fluid) ngambi bisi dikena ba sektor automotif.

Sarawak Petchem ti ngempu sebuah kilang metanol besai ba Sarawak nyadi entiti nengeri keterubah ti nguji masuk ba pengawa bekaul minyak enggau gas ili.

Baca lain  Nembiak diperansang ngaul ekonomi digital

Kilang nya ditaga berengkah beoperasyen ba suku kedua tahun 2024.

PCG ngembuan pengulih ngasilka produk begulai sepenyampau 15.4 juta tan petrokimia per annum nyengkaum olefin, polimer, sum, metanol, produk pugu asil kimia bukai sereta kimia ‘specialty’.

Juluk Sarawak ti deka ngaga kilang ammonia udah ditemu semua orang tang sebedau tu PETRONAS nadai madahka diri deka nerima ekuiti ba projek nya.

PETRONAS abis nadai bisi empat kilang ti ngasilka ammonia ba Malaysia ba baruh PCG.

Nengeri Sarawak udah bejalaika pengawa kediri ba dagang ili baka ngaga kilang metanol 1.75 juta mtpa ti beungkus RM3.75 bilion ti dipenggi Sarawak Petchem ti bepalan ba Tanjung Kidurong, Bintulu taja pen kompeni nya minta PETRONAS Chemicals Marketing (Labuan) Ltd ngelaku metanol ti diasil dia.

Enti kilang nya berengkah beoperasyen ba tengan bulan June 2024, Sarawak Petchem deka nyadi kompeni ti diempu Perintah Sarawak ti keterubah ngasilka metanol.

Perambu ngaga kilang ammonia biru nya udah dibantai Abang Johari ba bulan September 2023.

Maya nya, Abang Johari madahka Sarawak udah mutus ati enda ngaga kilang metanol kedua pengudah Tanjung Kidurong tang berebak ari peminta besai ari Eropah, ASEAN enggau Timur Jauh, dia iya minta Sarawak Petchem ngaga kilang ammonia.

Perintah Sarawak benung bejalaika sebuah projek ammonia gadung ba nengeri tu iya nya Sarawak H2biscus ti mungkur sebuah kilang hidrogen gadung enggau pengulih 150,000 mtpa setaun kelimpah sebuah kilang pengawa ngalih ammonia gadung enggau pengulih 850,000 mtpa.

Projek nya diatu ba renggat ‘front end engineering design’ (FEED). Pengawa ngaga klasifikesyen ammonia ngagai biru tauka gadung dikena madahka chara gas bau tajam nya diasil.

Ammonia biru nya sebengkah versyen ammonia kelabu konvensional ti mimit karbon.

Karbon dioksida (CO2) ti diasilka ammonia kelabu ditangkap lalu disimpan dikena ngurang empas ngagai klimet.

Ammonia gadung diasil ari pengawa ngaga ammonia ti 100 peratus ulih dikena baru lalu nadai karbon baka ngena hidrogen ti diasil nengah elektrolisis ai ti ngena RE.

Tebal agi ammonia dikena ngaga sum ba pengawa betanam betupi kelimpah dikena ngaga gas peti ais, nuchi bekal ai, nginjin plastik, peletup, tekstil, rachun indu utai, enselup enggau mayuh agi ti bukai.

Pia mega, ammonia dikumbai ulih nyadi alternatif ngagai minyak api fosil (fossil fuel) ti narit ati.

PETRONAS bisi empat kilang ammonia iya nya bepalan ba Kerteh, Terengganu (enggau pengulih 450,000 mtpa), sebuah agi ba Gurun, Kedah (400,000 mtpa), sebuah ba Sipitang, Sabah (770,000 mtpa) enggau sebuah ti bukai ba Bintulu, Sarawak (450,000 mtpa).

Bepelasarka ripot ninting taun PETRONAS Chemicals, empat buah kilang nya ngeluarka 2.17 juta tan metrik ammonia ba taun 2022 lalu bisi 736,000 tan metrik udah dijual.

Baca lain  Atlit Sarawak terus nyulut nambah midul

Ba taun 2016, PETRONAS nyain sempekat enggau Perintah Sarawak ngambi mekal 450 juta kaki kubik standard sehari (MMscfd) gas asal ngagai Sarawak dikena ngasil kuasa sereta industri petrokimia ti dipenggi Perintah Sarawak nyengkaum kilang metanol ba nengeri tu.

Sempekat nya ngujung ke PETRONAS Carigali Sdn Bhd ngaga Fasiliti Gas Tambah Bintulu tauka BAGSF-2.

Lima taun udah nya, PETRONAS nyain MoU dikena nambah bekal gas asal nya ngagai 1,200 bilion kaki kubik standard gas sehari ungkup Sarawak.

LADANG AGROVOLTAIK

Siti projek agrovoltaik ti beungkus bebilion ringgit ti deka ngempung sebuah loji solar besai enggau ekonomi pemakai jelu meruan tauka ‘sustainable animal feed economics’ (Safe) sereta dipejalai begulai entara kompeni ari Malaysia enggau China ti udah diperambu ungkup Sarawak.

Projek ba wilayah utara Baram nya deka dipejalai begulai entara Planet QEOS Sdn Bhd enggau China Machinery Engineering Corp (CMEC) Investment lalu ungkus belanja dikena ngaga projek nya ulih niki ngagai RM10 bilion.

Projek kompleks agrovoltaik Safe deka nerima kuasa ari kilang solar 1,000 megawatt hour (MWh) ti ngena teknologi moden lalu deka ngasilka mayuh pemakai jelu neutral karbon sereta manuk dagin.

Ba sebengkah penerang begulai, Planet QEOS enggau CMEC madahka teknologi ngena paten ti nyendia kuasa ngagai kebun agrovoltaik Safe ulih mantu ladang kuasa nya ngasil kuasa 1,430 GWh ninting taun, 170,000 tan pemakai jelu neutral karbon enggau 25 juta manuk dagin bepelasarka rega tetap ti dikenukuka dulu agi sereta meruan pengelama 30 taun.

Konsep baru nya disadang deka nentu makit Sarawak bisi akses ngagai kuasa meruan enggau rega manuk pengelama betaun ti deka datai.

Planet QEOS nya sebuah anak serikat QEOS LED Sdn Bhd ti deka ngeruga rentayan pengawa mekal chara lama enggau musin nanam chara lama kelimpah nyungkak pengawa betanam betupi ba skala komersial sepemanjai taun.

KARBON SITI KOMODITI

Karbon diatu nyadi siti komoditi ti enda ulih dikelaung lalu pia mega klimet ti majak berubah pen nyadi siti kebuah karbon enda ulih dikelaung.

Ambi ke chunto, Great Barrier Reef ba pantai timur Australia udah lenyau 50 peratus ari batu karang dia berengkah ba taun 1995 laban tikas pengangat ba tasik nya udah niki.

Pekara nya ngasuh Australia nanggung belanja bebilion dolar laban batu karang nya nyadi endur diau bemacham jelu tasik ti nadai ditemu ba menua bukai lalu berebak ari nya sida napi penusah.

Komuniti barat diatu nerima penemu ti madahka pemansut gas rumah gadung (GHG) ti kelalu balat ngujung ke tikas pengangat dunya majak nambah lalu gaya hari ti ekstrim agi.

Pengangat dunya ngasuh api ti enda ulih dirara nyadi ba Greece, Australia enggau California.

Baca lain  Telefon nuju DDMC nyema bisi peranak Kuching suntuk pemakai

Ubah klimet ngasuh bah besai nyadi ba Jerman enggau Australia.

Fenomena ujan ti nyadi ba padang ais ba Greenland nya keterubah iya nyadi dalam sejarah dunya.

Jugam kutub bejalai jauh agi ke selatan laban deka ngiga pemakai pengudah ais Artik lela.

‘Climate refugee’ tauka orang kampar tasah klimet diatu siti leka jaku ti udah dikelala mensia mayuh lebuh sida benung nyelamatka diri ari penusah ti nyadi ketegal ubah klimet.

Mayuh perintah sekali ke kuku besi tauka demokratik udah madahka pelin ba pengawa ngurang minyak api fosil ba timpuh 10 ngagai 30 taun ti deka datai.

Minyak api fosil kelebih agi dikena nyendia pengangat enggau bejalaika perengka pengangkut.

Perengka pengangkut pemadu muntang nitih atur laban modal perengka pengangkut nya (entukar, bas, trak) bisi teknologi alternatif (baka entukar elektrik) tauka minyak api meruan (baka biofuel jet).

Perengka pengangkut deka berubah enggau nyengala ba timpuh 15 ngagai 20 taun ti deka datai.

Industri minyak enggau gas ngasil lalu ngena minyak api fosil tang industri bukai semina ngena petroleum aja.

Merambu pelin karbon chukup tusah laban reta minyak enggau gas bisi ba sebarang endur tauka ba tasik lalu mar diakses.

Makit modal diatu minta penerang ti silik agi pasal pemansut GHG kelimpah pasal chara kompeni dikena ngatur enggau ngurang empas klimet.

Makit nya mega bela nyendia insentif pekara wang ngambi ubah ti manah ulih nyadi.

Inovasyen baka rega karbon, kredit karbon, skim modal enggau dagang, karbon offset, dagang karbon sereta rega khas ungkup kuasa alternatif majak diatur kemas agi.

Inisiatif nya meransang orang dagang nyukat pemansut karbon sida lalu meranakka puku tauka ngena chara baru (nangkap enggau nyimpan karbon, kereban hidrogen).

PELUANG KARBON

Karbon udah nyadi komoditi baru ti narit ati tang bisi sekeda sukut ti nyelai agi.

Laban ti agi baru lalu semina diatu bisi insentif pekara wang, pemansut GHG naka diatu bedau tentu ulih matak pemeranak puku dalam metodologi sukat, perengka sukat sereta analitiks.

Nya kebuah pemereti ati pasal pemesai penanggul (tauka peluang) apin chukup.

Pia mega, standard ripot ti agi bedau ulih ngemantup ati.

Baka semua komoditi bukai, karbon ulih nyadi pun penatai pemisi.

Genap serumbung atap, seteri (weld), perengka beputar, tangki penyimpan, telaga produksyen minyak, enjin enggau penunu ulih nyadi pun pemansut GHG ti ulih disukat sereta ulih dikereja.

Seraris enggau rega karbon ti majak niki, pemansut GHG nya enda ulih enda diberi perati laban nya kelalu mar lalu udah tentu pengawa nangkap enggau ngalih ngagai kredit karbon ti ulih didagang meri penguntung.

Bala eksekutif ba industri minyak enggau gas enda ulih ngelaung komoditi baru ti berega nya.

BERITA LAIN

RM10,000 nganti Kumang Gawai Betong 2024

BETONG: Pekit Kumang Bagi Menua Betong 2024 nesau bala indu dara bansa Dayak selampur menua Malaysia ke beumur 18 taun enggau tuai agi ngerebut perais

Jini ninga indai manjung tiga kali

KUCHING: Anak tudah ti dipelaba ditagup jagu ba Sungai Rayu, Jalai Selang Lundu kena Hari Tiga tu tadi bisi ninga indai iya manjung tiga kali

BERITA TERBARU

Bacaan IPU Sarawak baik, sederhana

KUCHING: Indeks Pencemaran Udara (IPU) di seluruh Sarawak menunjukkan bacaan baik dan sederhana serta tiada bacaan tidak sihat direkodkan susulan letusan Gunung Ruang di Sulawesi