AMAT besai jasa bala orang bumai laban seleka berau ngundan setitik peluh sida ti bekeradai ngiga jereki dikena ngulih sesuap asi.

Mulai ke baru pengingat lebuh agi nyadi nembiak suba, rindu sereta gagit amat ati kitai meda pemanah rampa umai ti nyau sedandang.

Lantang amat ati lebuh meda umai nyau sedandang gadung enda nyalah baka selambar tikai karpet besai ti benung dianchau.

Enda ibuh disebut enti musin ngetau enda nyalah baka karpet emas ti dianchau laban tangkai padi nyau kuning nganti diketau.

Lebih manis lebuh seraban burung bekichau sebelah umai lalu ditambah ke bunyi daun padi ti nyau bekerisik dipuput ribut ngalun kin kia.

NANAM PADI

Ngelansa pekara nya, siku peranak Kampung Betanak, Daro, Mohammad Gadafi Mas, 35, madah, musin ngetau udah datai pengudah enam bulan nganti padi mansau penuh berengkah ari bulan Disember tu tadi.

Tebal agi, peranak Sarawak enggau Sabah nanam padi bukit ba kaki bukit enggau munggu ti ditebas lalu ditunu.

Entara bansa padi ti ditanam sida baka padi wai, padi Bario, padi pulut chelum, padi wangi chelum enggau mayuh agi ti bukai.

“Pengawa nanam padi tu endang dikereja pengudah ngintu pengerami Hari Gawai urung bulan Julai nyentuk bulan September.

“Kebendar pengawa tu bepanggai ba sekeda endur, bisi sekeda tumu berengkah lalu bisi mega laun berengkah nanam padi.

“Sebedau pengawa nanam pagi tu berengkah dikereja, bala orang bumai deka nebas enggau nunu dulu temuda sida.

“Pia mega, pengawa ngetau suah dikereja ba ujung tauka pun tau entara bulan Disember nyentuk bulan March.

“Padi mansau lalu tau diketau beguna ke timpuh urung enam bulan pengudah ditanam.

“Laban pengawa nanam padi tu agi bepanggai ba chara lama, nya kebuah tebal agi bala orang bumai ba Sarawak semina ulih ngeluarka asil padi setaun sekali,” ku iya.

NGEMERAN CHARA LAMA

Pia mega, lebuh musin ngetau, bala orang bumai dia deka ngaji sebarang orang ti deka mantu sida ngetau padi ngena chara lama.

Tebal agi sida nya endang kaban belayan tauka peranak genturung pendiau dia empu dibayar gaji RM35 sehari.

Pengawa ngetau padi nya endang agi ngena ketap sambil ngema ‘tiwai’ iya nya sebansa uyut ti digaga ari wi.

Bansa Iban ba rumah panjai pen bela ngena chara sebaka lebuh ngetau padi tang sida nangkin sintung ba punggung.

Nemu kita?

Ketap dikena ngetau padi nya digaga ari pisu mit ti udah dilekat pemegai ngena kereban khas.

BEDURUK

Kelimpah ari nya, ku Gadafi, tebal agi sida dia bejalaika pengawa ngetau ngena chara beduruk iya nya sida deka besaup ngetau ba umai siku-siku.

“Pengawa ngetau ngena chara beduruk tu nadai dibayar gaji tang bela betulung pangan diri.

“Pengudah tembu ngetau ba umai siku tu, kami deka mindah ngetau ba umai siku agi lalu pengawa tu ditampung kami nyentuk gintir pangan diri abis.

“Ambi ke chunto, enti sehari tu A mantu B ngetau ba umai iya, hari siti, B deka nulung ngetau ba umai A lalu pia mega pengudah nya nyentuk pengawa ngetau abis dikereja,” terang iya.

Asil ti diulih ngetau dalam sehari nya bepanggai ba pemayuh sida ti ngetau.

Enti mayuh bala besaup ngetau, mayuh agi ga asil padi diketau sida nyentuk bebelas tauka bepuluh guni dalam sehari sereta jampat agi ga umai nya abis diketau.

“Enti dalam sehari bisi 20 iku beduruk ngetau, asil diulih sida ngetau pen manggai bepulug guni dalam sehari.

“Tang enti hari ujan, pengawa ngetau tu deka diketu enda lama nyentuk ujan udah ngetu lalu tu ngasuh pengawa ngetau lubah tembu,” ku iya.

NGINJIN PADI

Gadafi madah, padi ti udah diketau sida deka dijembi nyentuk rangkai sebedau diinjin nyadi berau.

Sebedau pengawa nginjin padi, orang bumai deka nungku padi ngena kaki dikena nyerara leka padi ari tangkai padi.

Pengawa nya beguna ke pengering tulang laban ditungku ngena kaki.

Tebal agi, asil padi tauka berau ti udah diinjin nya endang ungkup diri empu aja lalu bisi mega dijual ngagai orang bukai enti bisi mayuh asil diulih.

Berebak ari pemansang ti bisi ba Kampung Betanak, Gadafi madah, pengawa ngangkut padi ngena perau tauka bejalai kaki jarang dikereja pengudah sida udah bisi jalai alun.

“Diatu kami ulih ngangkut padi ngena motosikal, entukar tauka lori lalu tu mayuh meri pemaik ngagai peranak ditu enti dibanding sebedau tu guni padi disan bedarat ari umai ngagai rumah.

“Jalai besai Pulau Bruit meri pemaik ngagai sida mindah kin kia kelebih agi maya ngangkut guni padi lalu ulih sangkai ba mua rumah,” ku iya ti rindu ke pengawa seni ngambar.

NGEDUT KAUL

Lebuh bekunsika kenang manis maya ngetau padi, Gadafi madah, pengawa nya ulih ngedut pemanah kaul enggau pangan diri.

Ku iya, kebuah pia laban pengawa ngetau nya dikereja ngena chara beduruk lalu maya ngetau kitai ulih betundi bebuti tauka bekunsika mayuh cherita enggau pangan diri.

“Umai mega jampat abis diketau laban mayuh bala beduruk ngetau enti dibanding ngetau nengali kediri.

“Tu meh pemanah ari pengawa ngetau ngena chara beduruk lalu tu seruran dikereja kami nyentuk sehari tu,” ku iya.

Nambah nya iya madah, pengawa makai bebala mayuh ba tengah umai semina belauk ke ikan masin enggau sayur aja pen ulih ngasuh kenyang.

“Gaya ba umai ti lantang enggau sunyi ngasuh kitai kenyang makai bebala mayuh,” ku iya.

NYUNGKAK PENATAI PEMISI

Kelimpah ditanam ungkup diri empu, peranak Kampung Betanak mega bela nyual berau ti udah diinjin sida ngagai orang tengah.

Orang tengah ti meli berau nya endang peranak ba genturung pendiau dia empu lalu sida meli enggau rega RM7 sekilogram.

Udah nya, sida deka nyual baru berau nya ngagai bala pemeli ba Pasar Sibu enggau Sarikei.

Berau baru nya mayuh peminta sereta ngembuan peminat kediri empu.

Entara bansa berau dijual sida, berau ari padi wai meh pemadu berega iya nya RM10 sekilogram.

Berau nya ngembuan bau angi kediri empu, lembut dikunyah, bekualiti lalu mayuh peminta.

Ukai naka nya aja, bemacham produk ulih digaga ari asil padi nya baka keretop, emping enggau ti bukai.

Produk keretop digaga ari pulut chelum lalu dijual enggau rega RM14 sebutul.

Raban indu suah ngaga emping ari padi ti ditanam sida sekali ke nya digaga ungkup diri sebilik tauka dijual dikena nyungkak penatai pemisi tambah.