Pengundi biak dikearap mereti hak ngundi

KUCHING: Hak ngundi tu endang pekara besai lalu perambu nginsur tatak umur pengundi ari 21 ngagai 18 taun, insiatif ti manah lalu patut diperetika raban nembiak.

Sida patut mereti enggau nemu pasal politik maya nyadi pengundi laban undi sida nentuka kuing menua jemah.

Kenu ku penemu Nor Nadirah, 22 taun, nentuka raban diselinting dulu agi meretika pekara pemun bekaul enggau politik enggau reti jaku dikumbai demokrasyen sebedau ngaul diri ba parti enggau sistem politik di Malaysia.

“Pelajar beguna amat ngambika nembiak sedarka pemesai guna ngundi enggau baka ni sistem atur pengawa di Malaysia baka subjek Pengajian Am diajar ba Pom Enam.

“Kebuah pia laban enti sida nadai seling penemu pasal politik, bala nembiak enda ulih berati pekara ti betul lalu semina sekeda aja landik bepolitik enggau ngundi jemah,” ku Nor ti benung nampung pelajar ba Universiti Malaysia Sarawak (Unimas) ditu.

Jamil Mohamad Taha

Sepenemu enggau Nor, Rose Ragai, 38 taun, ari Dalat madahka nentuka bala pengundi bisi seling penemu pangku pengawa sida, subjek ti diajar baka Jaku Melayu, Jaku English enggau Sejarah patut bisi isu politik.

Ku iya, tu dikena meransang runding sida enggau meretika agi sistem politik enggau demokrasyen di menua tu.

“Apai indai patut meretika isu politik kemaya hari lalu enda malut runding bala anak, kelalu ngasika parti politik tang beratika gaya ketuai ti megai perintah.

“Nya alai apai indai patut seruran muka runding enti bala anak nanya tau ngemai berandauka isu politik lalu ngelempaika anak sida empu milih enggau ngundi pengari rayat nitihka peneka sida,” ku iya nerang silik.

Ku Siti Noradila Osman, siku pedagang biak, ari sukut psikologi umur 18 taun tu tikas umur ti ngasika jaku ajar enggau runding sida benung mansang.

Nor Nadirah Rosliza

Nitihka pematut mega, maya nembiak manggai umur tu, sida udah ngelala ni bagi utai ti manah enggau enda, belajarka penemu politik enggau demokrasyen, meretika semengat talukka menua enggau nempa ulah ti menyana naydi rayat Malaysia.

“Aktiviti bekaul enggau politik patut semampai diatur baka ngajar atur pejalai hari ngundi ngambika sida nemu baka ni gaya hari ngundi ke amat dipejalai.

“Kitai mega tau nerang ngagai sia pasal pemesai guna pengawa ngaul diri ba politik ngambika sida enda alah penemu enggau pengawa ti salah.

“Kelas tauka bengkel dikena nambahka seling penemu politik mega patut dipejalai, tang enda tau bechiping tauka nanahka sekeda parti tauka raban politik.

“Kebuah pia laban kitai dekaka rebak nembiak milih bepelasarka penerang ti lurus lalu sida bisi hak ngaga pemutus ungkup pengelantang menua jemah,” ku iya madah nyemetak.

Rose Ragai

Jamil Mohamad Taha, 28 taun bepenemu, tuju nambahka seling penemu politik ngagai raban diselinting ulih dijapai ari pengawa ngemesaika pemereti ati pasal chara penumbuh perintah ba atur kimpin pasal politik tauka chara ngundi.

Ku iya, subjek pasal politik mega ulih diajar ba renggat sekula kelebih agi ngagai nembiak Pom Lima dikena nyikap sida ngena penerang tumu nyadi pengundi.

“Kelimpah ari nya, apai indai patut bejalaika pangku pengawa sida, netapka penemu maya ngajar bala anak ngaga pemutus ti meri pengelantang.

“Ajar sida chara berunding ti lurus, anang jampat tepejuh enggau siti isu ti semina meri penguntung ngagai sepiak piak aja.

“Nya alai sistem pelajar tauka meda rama patut ditegapka agi dibida pemerindang dikena nempa raban nembiak ti mereti enggau landik ba politik,” tandu iya.

 

Siti Noradila Osman

Suara Sarawak