KUCHING: Gerempung Tinju Nengeri Sarawak (Saba) udah ngelala peninju bepenau sepanjai pengawa matau dipejalai ba Pekit Tinju Nembiak Nasional 2023 empai lama.
Bala peninju bepenau ari pekit nya deka dikangau ngulu pengawa milih chalun ti deka diatur ba bulan Julai tu.
Presiden Saba, Datuk Rahman Lariwoo nyemetak madah, sida mujur bulih pemaik nengah sekeda peninju baru bepenau nya.
“Kitai udah ngelala sekeda peninju baru ari pekit tinju tu tadi.
“Sida deka dikangau ba pengawa milih peninju dikena numbuh ke tim baru napi Lumba Malaysia (Sukma) 2024,” ku iya lebuh dirandau pemberita.
Seraya enggai ngelansa silik penyampau tubuh peninju baru nya, Rahman madah, sida deka ngaga aum dikena berandauss pekara bekaul.
Ku iya, aum nya mega deka nentu ke haribulan dikena ngepun ke pengawa matih bala peninju ti deka bepekit ba Sukma 2024.
“Raban Saba deka ngatur Pekit Tinju Mit Nembiak ba Bagi Menua Serian ba ujung bulan June ila.
“Pengawa milih tu dikena ngiga peninju baru ti deka dianjung ngambi bagi ba lumba besai menua,” ku iya.
Rahman ngaku, raban sida deka ngena pengelebih Sarawak nyadi tuai rumah endur ngatur Sukma 2024 sereta deka ngulihka mayuh agi midul emas.
Ungkup rikod, tim tinju mujur bulih lima midul penuh ungkup Kontinjen Sarawak ba Sukma XX Kaunsil Lumba Menua (MSN) 2022 di Kuala Lumpur nyengkaum dua midul emas, dua midul pirak enggau siti midul engkeraju.
Midul emas nya diulihka Daeionel McDelon enggau Jackson Chambar Ikeh lalu kededua peninju nya enda ngambi bagi ba Sukma 2024 ketegal penanggul umur.
