Penjana nyungkak ekonomi menua

KUCHING: Pelin Nyungkak Baru Ekonomi Menua (Penjana) ulih nambahka pengandal bala penguna, pedagang enggau pemeranak puku sekalika dalam menua enggau entarabansa, pia ku Felo Akademi Sains Malaysia, Dr. Madeline Berma.

Ku iya, inisiatif nya ulih dikena mutarka pekara ke enda disadang nyadi dudi hari nengah program latih pengelandik.

“Penjana kebendar nampung Pakej Peransang Ekonomi Prihatin Rayat (Prihatin) ti udah dibantaika sebedau tu.

“Pekara tu meri pangka positif lebuh bejalaika polisi fiskal nengah inisiatif meri insentif, rebat, subsidi upah enggau agih belanja ngambi mantu rayat, nyungkak aktiviti dagang sereta nyungkak ekonomi,” ku iya lebuh dirandau Suara Sarawak, ditu kemari.

Taja pia ku Madeline, bisi pengurang ba Penjana ke tau dikemanah tauka ditambah dudi hari.

“Kebuah pia laban Penjana semina fokus pasal bantu enggau insentif ngagai dagang mit enggau jelan pemesai (PKS), serikat bekaul perintah (GLC) sereta ‘sektor formal’.

“Nambahka nya, inisiatif nya mega nadai mantaika bantu ungkup pedagang dalam ‘sektor enda formal’ baka pedaja ti suah disereta raban indu,” terang iya.

Nangkan nya ku Madeline, ‘sektor enda formal’ mega ulih nambahka penatai pemisi dikena nupi sida sebilik.