Penovis udah dikemendar ROS

SARATOK: Penumbuh Gerempung Novelis Iban Sarawak (Penovis) dikearap ulih nyadi ke pelasar endur bala penulis novel menua tu belajar sereta neleba diri nulis novel dalam jaku Iban.

Chairperson iya, Felecia Lubok madahka penumbuh Penovis nyadi pelasar engkeman alai raban penulis ari menua tu (Sarawak) belajar sereta ngerembaika penau diri ba pengawa ngarang novel.

Penovis mega deka meransang sida ngarang novel ngena sepil enggau jaku Iban standard baka ke diguna ba sekula kelimpah nyaup sida ngasilka bup novel diri empu.

“Kebendar, tu siti ari inisiatif dikena ngempuru semua penulis novel Iban ngambi ulih begempung lalu ngerembaika asil karang nengah siti perabung awakka ulih pegari.

“Enti kitai meda ba lambang Penovis tu bisi baka gambar orang ti benung macha bup ke mai reti iya nya siku penengkebang novel patut meretika sereta nemu batang jalai cherita ke ditulis diri.

Felicia Lubok

“Kebuah pia, laban suah penengkebang novel enda nemu bida utai ke dikumbai jerita, cherita enggau ensera maya nulis.

“Penanggul ke baka tu mega siti ari pekara ti deka dimalin kami dalam gerempung tu,”ku iya nerang ngagai Suara Sarawak.

Ungkup penemu Penovis udah mujur direjista lalu dikemendarka Opis Pengerejista Gerempung (ROS) kena 17 Februari tu tadi.

Ku Felecia, mayuh penulis diatu enda nemu bida ensera, jerita enggau cherita. Enti pekara nya enda dirara nyadi tau bendar mai pengerugi.

“Ambi chunto, baka ensera dibagi ngagai dua iya nya ensera kontemporari ke nadai ngundan cherita bekaul enggau petara, sebayan sereta jelu tang pekara ti nyadi sebedau penatai teknologi pengidup.

“Ensera lama ngembuan leka jaku bebungai, jaku dalam, jaku ensumbar, gela enggau leka main sereta bisi nyangkut petara, sebayan enggau jelu.

“Tang kededua nya tetap nyeritaka gaya pendiau mensia ba jeman kelia ti agi beserimbai pengidup enggau jelu, petara sereta sebayan.

“Nya alai, nuju bala penulis Iban arapka sama begempung besukung ngerembaika jaku Iban dibaruh Penovis ngambi pulaika pemaik semua,”ku iya.

Opis Penovis bepalan ba Lumur 528, Lorong 1Z, Kampung Tabuan Ulu,Jalai Foochow Lumur 1 di Kuching. Kelimpah Felicia kaban Penovis ke bukai iya nya Sapit Chairperson Patrick Sijun, Sekretari Jerryson Chua, Sapit Sekretari Mendu Milly, Tukang Wang Emilia Ajut sereta dibantu kaban AJK Tiffany Richard enggau Amis Stephent Liban.

Penerang silik sentang Penovis tu ulih dipeda ba media rama Youtube, Facebook enggau Telegram Penovis kelimpah ulih telefon terus nuju opis ba lumur 012-8926798 tauka 013-7481539.

Suara Sarawak