KUCHING: Sekretari Perintah Sarawak, Datuk Amar Jaul Samion pinchin rasmi ensana pengudah gawa dalam Perintah sarawak lebih 42 taun.
Sapit Sekretari Perintah Sarawak (Perambu Ekonomi enggau Pemansang), Datuk Seri Mohamad Abu Bakar Marzuki diatu mangku pengawa nyadi Sekretari Perintah Sarawak nyilih Jaul ke udah mangku pengawa nya kenyau ari 22 Ogos 2019.
Jaul nyerahka pangku pengawa ngagai Abu Bakar Marzuki ba sebengkah pengawa di Wisma Bapa Malaysia, kilah ensanus.
Sama datai Sapit Sekretari Perintah Sarawak (Atur Pengawa) Datuk Ik Pahon Joyik sereta direktor ari unit di baruh Opis Premier Sarawak.
Nambahka nya, Jaul mega ngemataka pengawa serah terima pangku pengawa Unit Imigresyen enggau Pengereja Pengawa (Ilmu) ari Unit Pengatur Pengawa ngagai Direktor Ilmu, Jack Meredu Ko.
Ilmu udah ditumbuh kena 28 Oktober 2021 ke beempu tanggung pengawa enggau matau penatai peranak luar ke Sarawak dikena nyaga pengelikun menua.
Tuju Ilmu tu dikena negapka penau menua enggau bejalaika polisi pengereja pengawa enggau imigresyen, program enggau atur pengawa ngambi meri empas positif ngagai pengereja menua luar, beranakka puku enggau dagang ari selampur menua enggau di menua luar dikena nyungkak pemansang ekonomi menua.
Ungkup rikod, Jaul kala mangku pengawa nyadi Sapit Sekretari Perintah Sarawak (Transfomasyen Menua Pesisir) bepun 8 Ogos 2016 nyentuk 16 Mei 2019 sebedau mangku pengawa nyadi Sekretari Perintah Sarawak bepun 17 Mei ngagai 21 Ogos 2019.
Jaul mega anak Iban kedua mangku pengawa nyadi Sekretari Perintah Sarawak udah dichiri nitihka peneleba iya gawa dalam perintah sebedau tu.
