Belaga: MP Hulu Rajang Datuk Wilson Ugak Kumbong begulai enggau Adun Belaga Datuk Liwan Lagang sereta Adun Murun Kennedy Chuk Pai Ugon bisi ngatur pejalai ngabas peranak Uma Bawang di Sungai Asap Belaga ti tasah angus rumah.

Dua luntang rumah panjai nya angus lengis ba penusah ke nyadi Hari Dua tu tadi.

Berebak enggau pejalai nya, Wilson udah meri bantu penyampau RM20,000 ngagai 96 isi bilik ke tasah.

Datuk Wilson mega minta Opis Menteri Kaunsil Kandang Menua enggau Pengawa Berumah (KPKT) berunding numbuhka Opis Raban Pengerara Api enggau Penyah Penusah (Bomba) kategori E ba sitak Sungai Asap enggau jampat.

Kebuah pia ku iya, raban Bomba ke bisi diatu urung 200 km penyauh ari Sungai Asap ti begunaka timpuh pejalai urung dua jam napatka endur penusah nyadi.

Pengawa numbuhka opis tu beguna amat dikena nyikap diri napi sebarang penusah ngenyit ti tau nyadi jemah.

Sama meri bantu Chuk Pai Ugon penyampau RM44,000 enggau Datuk Liwan Lagang RM15,000 dikena ngelempungka tating penusah sida ke tasah.

NGABAS… Bala pengari rayat ngabas taba rumah panjai ke angus Hari Dua tu tadi.

 

MERESA… Datuk Wilson meresa paip bomba ti dikena ngerara api lebuh penusah nyadi.

Suara Sarawak