Penumbuh Kaunsil Mulung Sarawak benung diperunding

DALAT: Perintah Sarawak deka berunding pengawa numbuhka sebengkah kaunsil matau, nambah enggau ngenegapka pemansang industri mulung di Sarawak.

Seriris enggau nya, siti raban khas deka ditumbuh dikena nyaga pemansang industri deka berandau di Kuching minggu baru.

Sapit Kepala Menteri Datuk Amar Douglas Uggah Embas madah, perambu numbuhka Kaunsil Mulung Sarawak nya penemu ti manah lalu opis menteri iya deka berandau silik sentang pekara nya.

Iya mansutka jaku nya rambau atur randau begulai enggau pekebun mit mulung di Palan Pemansik Sungai Talau Craun (ungkup mulung), kemari.

Ku Uggah, perintah ngaku pemansut mulung majak nyukung ekonomi Sarawak, ke alai dalam taun 2017, komoditi nya berega RM86.8 juta.

PATUT DITUNDA… Uggah disempulang Fatimah enggau bala bukai lebuh ngabas taba mandangka nanas di Palan Pemansik Sungai Talau Craun, Dalat kemari.

“Taun 2000, rega eksport manggai RM24.2 juta enggau niki ngagai RM62.8 juta taun 2010. Kitai meragam rega deka niki manggai RM100 juta datai ba taun 2030,” ku iya.

Iya deka ngetuaika aum nya begulai enggau Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Sarawak Datuk Seri Fatimah Abdullah.

“Kami deka beratika sebana pekebun mit enggau industri ngambi ulih diputar,” ku iya seraya nambah, siti ari isu ti patut diperunding, baka ni ngangkut batang mulung ti ditebang ngagai kilang, nadai begunaka jalai tauka sungai.

Menteri Betanam Betupi Moden, Tanah Adat enggau Pemansang Kandang Menua mega udah ngemendarka agih belanja penyampau RM11 juta dikena ngemansangka industri taun tu.

Mukah pemansut besai Mulung Sarawak, urung 40,642 hektar udah ditanam.

Uggah mega ngelalau pekebun mit ngemayuhka aktiviti ekonomi sida ngambi mayuh agi pemansut belanja.

Iya meri langgur penemu ngagai sida nanam utai bukai baka nanas enggau pisang ke diatu nerima peminta tinggi di luar Sarawak.