Penumbuh Yayasan John Jinep besai reti ba Dr Beverlyn

BAU: Anang mantul ngapa, ati mesti bisi pengandal enggau pechayaka pengelebih diri nempa pemujur dudi hari.

Nya mih jaku peransang dikena siku nembiak benama Dr Beverlyn Felix meransang diri ngulihka juluk ati nyadi lutur.

Pengeransing Dr Beverlyn dalam pelajar dataika ulih nyadi lutur tu patut nyadi chunto ngagai rebak biak.

Peranak asal Kampung Suba Buan mujur nembuka pelajar ba Universiti Malaysia Sarawak (Unimas) madahka pemujur iya nya mega datai ari sukung siku tuai di menua tu.

Ku Dr Beverlyn, sukung ari Datuk Henry Harry Jinep enggau bakih iya ngasuh juluk ati ulih dijapai.

NGENANG JASA… Dr Beverlyn begambar ungkup kenang enggau Henry pengudah tujuh taun.

“Sukung Datuk Henry enggau bakih iya ari sukut belanja udah nyaup aku lebuh nampung pelajar suba.

“Sigi tusah aku deka nampung pelajar laban lebuh nya kami sebilik suntuk amat.

“Enti Datuk Henry enggau bala bukai enda nyaup aku, nyangka enda aku ulih nampung pelajar lalu bulih juluk ati baka diatu.

“Pesan aku, anang kakang ati minta saup ari bala bukai kelebih agi tuai genturung pendiau ngambi sama berundingka chara mutarka penanggul ditapi kitai.

“Anang enggai betanya ngagai bala bukai ba dini kitai ulih minta belanja tauka minta saup laban kitai ngembuan tuju deka ngubah nasip diri.

SINGKANG KETERUBAH… Gambar kenang Henry begulai enggau Beverlyn sereta indai iya sebedau nampung pelajar suba.

“Kebuah pia laban bisi orang manah ati baka Datuk Henry deka nyaup kita nentuka juluk ati kita deka nampung pelajar ngagai tikas ke tinggi agi nyadi nyata.

“Pelajar nya kunchi kitai bulih pengidup ti menyana, nya kebuah kitai mesti bebendar berundingka chara nampung pelajar ngagai tikas ke tinggi agi.

“Enggau peluang tu, aku meri besai terima kasih ngagai Datuk Henry laban udah nyaup meri belanja nentuka singkang aku ngiga pemandai ngagai tikas ke tinggi agi.

“Aku mega ngarapka pemujur tu deka nyadi peransang ngagai bala nembiak ti agi besekula,” ku jaku peransang Dr Beverlyn ngagai rebak biak.

Nambahka nya, Dr Beverlyn nya entara orang keterubah ti nyadi peransang numbuhka Yayasan John Jinep ke alai iya mega kala nerima pemeri ari Yayasan John Jinep tu.

Pemeri nya mesti dikena manah ungkup belajar kelebih agi ba taun keterubah nampung pelajar sebedau dipelanja JPA.

Pengudah tujuh taun, Dr Beverlyn betemu baru enggau Datuk Henry ba sebengkah program ti diatur ba Kampung Suba Buan.

Penerang dikunsi dalam ruai Facebook Datuk Henry Jinep nya patut nyadi peransang rebak biak ngambi enda mantul ngapa ngulihka penemu.

PERANSANG BELAJAR… Gambar Dr Beverly nerima pemeri ari Henry sebedau nampung pelajar dalam bidang perubatan ba taun 2015.

Suara Sarawak