Penusah aya Achan diperati Hope Place

KOTA SAMARAHAN: Hope Place Kuching semampai nandu pengawa sida mantu raban orang tusah ba menua tu.

Sekali tu sida udah nganjung bantu ngagai siku orang tuai beumur 65 taun idup sebatang kara ba Kampung Mang Besidi ditu.

Achan Tair ke enda entu pengerai sereta napi penanggul suntuk belanja.

Nitihka penerang, aya Achan mega bisi menawa kekatat bejaku enggau tubuh gegetar lebih 15 taun ke udah lalu enda ulih bediri lama kelimpah bejalai ngena tungkat.

Berindik ari nya, raban Hope Place nanya sekalika iya ditepan penyakit dikumbai Parkinson tang aya Achan madahka diri enda nemu laban nadai orang kala mai iya ke Sepital Besai Sarawak ngambika diperesa silik.

Aya Achan nadai penatai belanja ke meruan tang semina bepanggai ba pengasih enggau penyinu ari peranak ke sama diau ba genturung nya.

Iya mega nadai orang ngintu enggau bebela laban ke diau kediri ditambah tubuh enda bepengerai ngasuh iya napi mayuh pemar lalu pengidup enda meruan baka orang bukai.

Raban Hope Place ke sama nganjung bantu kia berasai sinu meda gaya pendiau rumah ke alai dik enggau dinding dibalut pukat empelawa kelimpah kandang ngelingi rumah repa.

Nya alai sida merambu mai volunteer udah tu ngambika gawa beripai ngupas kandang ngelingi rumah sereta nulung aya Achan meresi rumah, muai pukat empelawa enggau pengawa bukai.

Tambah mega rumah agu udah runtuh lalu diatu semina bilik mandi engau agu ba gerija besemak ke ulih dikena tudah aya Achan.

Suara Sarawak