Penusah ibu Riau nerima perati PKP Selangau

SELANGAU: Pengidup ibu Riau Ngindang, disempama baka udah aruk dipukung enggau alung, udah labuh ditinggang lesung.

Udah ga sigi idup merinsa diau kediri enggau napi penanggul suntuk ai ketegal nadai disambung bekal ai beresi ke rumah, ditambah penusah enda ulih mindah ngiga belanja sekumbang Atur Tagang Pejalai (PKP) diterit ba menua tu.

Nitih ku penerang Tim Palan Servis Parlimen (PKP) Selangau, ibu Riau tu udah parai laki lalu diatu diau ba rumah PPRT ti udah tuduh sereta patut diseleti enggau jampat.

“Rumah ibu Riau tu nadai bekal ai beresi. Ba tisi jalai besai mega kami nadai meda sambung batang paip besai.

“Tudah semina ngandalka ai ujan ke ditimbun ba dalam tangki ke semina siti gegelik lalu napi penanggul suntuk ai maya musin kemarau,” ku penerang nya.

UDAH ENDA TEGAR BEJALAI… Gaya pendiau ibu Riau ke udah bungkuk.

Kelimpah ari nya, rumah tudah ibu Riau mega nadai disambung bekal kuasa karan, semina api kelita meri penampak ngagai iya lebuh malam hari.

Ibu Riau madahka diri kala minta ngagai Opis Bekal Kuasa Karan Menua Pesisir (BELB) tang nyentuk sehari tu lalu nadai nerima sebarang timbal ari opis nya.

Berindik ari nya, Tim Palan Servis Parlimen Selangau udah bejalaika pengawa ti patut baka ngambi gambar enggau ngaga ripot pasal utai ke patut digaga kena mutarka penanggul ibu Ruai.

“Abis nadai rumah tudah ditambah tangki ai tauka ngaga tekat ai ari bukit ti jauh beresi ari ai ujan ke ditimbun dalam tangki ngambika bisi diirup.

“Kebuah pia laban ai tangki semina ulih dikena bebasu tang enda likun diirup, tambah mega tubuh orang tuai enda entu regas sereta mudah sakit.

“Piak bekaul mega tau berunding nyendiaka sistem kuasa solar enti sema pengawa nyambung bekal kuasa karan ari grid besai enda ulih dirumban tauka dipejalai jam diatu,” ku penerang nya madah nyemetak.

Tim Palan Servis Parlimen Selangau ngarika Kaban Parlimen Selangau, Baru Bian, datai nganjung bantu pemakai ngagai rumah ibu Riau sereta penerima bukai ungkup sitak nya.

SINU…Ibu Riau madahka perabung rumah udah mayuh tuduh, nadai disambung bekal ai beresi enggau kuasa karan.

Suara Sarawak