Penyai ulah tebantai ari litan

Lutur sikar ngidupka seput nembiak dijamah indai iru

BAU: Program betuchuk vaksin ungkup nembiak mit dipejalai ba Sekula Primari (SK) Jagoi ditu Hari Dua tu tadi mujur ngidupka seput siku nembiak primari satu sekula nya ti dijamah indai iru ke mega ibu iya empu.

Penyai ulah indu nya tebantai pengudah siku ari lutur ti ngaul diri ba program nya meda mayuh litan telih baru enggau lama ba tubuh, jari enggau kaki nembiak mit nya lalu ngeripot ngagai piak sekula enggau polis.

Ketuai Polis Pelilih Bau, Deputi Superintendan Poge Nyaon ngenukuka ripot nya madah, berindik ari ripot diterima, piak sida ngetan indu nya kena Hari Tiga tu tadi urung pukul 4.50 lemai di Kampung Bogag, Jalai Serikin Bau.

Ku iya, indu ti benama Suzie Asminalia Alapis, 25 taun, udah belaki enggau semina ngintu ruang bilik aja.

NADAI ATI KASIH… Indu disangka nyamah anak iru

Nerang silik ku Poge, nembiak mit benama Nursyafika Aien Mahdi beumur enam taun, diiru indu enggau laki iya dalam taun 2017.

Nembiak mit tu anak ada menyadi tuai indu nya ti udah sarak enggau laki iya, ku Poge nampung.

Ku Poge, indai ada nembiak mit tu udah belaki baru lalu diau mendam di Miri seraya apai ada iya bekereja di menua bukai.

“Laki indu disangka madahka indu tu suah ngetil nembiak mit lebuh di rumah laban nganu enggau ngajar iya.

“Laki iya suah udah ngingatka iya anang kelalu kasar lebuh ngajar nembiak mit,” ku iya ba penerang kemari.

Kenu ku Poge, peminta reman indu deka dipejalai di Kort Bau.