SRI AMAN: Penyalah guna dadah ukai aja nyadi di kandang mengeri aja, tang majak nyerarai ke menua pesisir, ku Datuk Mong Dagang.
Kaban Kunsil Nengeri (Adun) Bukit Begunan nya ngelalau bala tuai rumah patut beratika nembiak diri awakka enda salah guna dadah laban nya tau ngerusak pengidup sida.
“Bekaban ukai dalih ti engkeman laban diatu kitai benung mutuska pengerekai igi penyakit Covid-19 enggau semua piak patut meri kerejasama,” ku iya.
Mong bejaku munyi nya lebuh bejadika ‘Program Taklimat Isu-Isu Semasa Peringkat Negeri Sarawak 2020’ di Rumah Ramping Gendang, Kampung Klauh Dau, ditu ensana.
Ba lansa sama, Sapit Direktor Penerangan Nengeri Sarawak, Azizi Abdul Rahman madah, ‘Program Taklimat Isu-Isu Semasa’ nyadika pelasar ngagai opis ti ulih ngenataika pesan bekaul ‘isu semasa’ kelimpah ulih nyidi enggau silik sereta betukar penemu enggau raban pakar ti patut.
“ ’Taklimat isu-isu semasa’ tu ulih nyadi ejen ba komuniti ti ulih mutarka isu petenah, propaganda, penyalah sosial enggau bekunsika berita ti enda entu betul ti nyadi ba komuniti kitai,” ku tandu iya.
Dulu ari nya, Tuai Rumah Ramping Gendang meri terima kasih ngagai piak pengatur laban udah milih rumah panjai sida endur bejalaika program nya.
Ba program nya mega diatur bepelasarka norma baru ti nitihka Atur Pengawa Standard (SOP) ti udah ditetap dikena nagang pandemik Covid-19.
Sama datai Sapit Residen Sri Aman, Elvis Didit, bala Ketuai Komuniti enggau ke bukai.
