Sarawak-Sabah Link Road (SSLR)
LAWAS: Pengingin lebih 50 genturung pendiau ba kandang menua ulu Lawas bisi jalai belakin deka dijapai ari pengawa ngaga Sarawak-Sabah Link Road (SSLR).
Menteri Kereja Raya Malaysia Baru Bian madah, SSLR tu jalan darat keterubah nyambung Sarawak enggau Sabah lalu ngelaung menua Brunei sereta disadang tembu dalam timpuh enam ngagai sepuluh taun.
Pengawa ngaga jalai alun tu deka nyambung 14 mengeri besai ba kandang menua ulu Sarawak enggau semua pemanjai 425 kilometer beungkus RM5.2 bilion.
“Kitai bisi amat pengandal jalai tu ila deka nyadi rentayan penyambung penuh ba Pulau Borneo entara Sarawak, Sabah enggau Kalimantan Indonesia.
“Pejalai projek SSLR tu bisi dua renggat enggau renggat keterubah dibagi ngagai dua pakej ke alai pakej keterubah beungkus 1.2 Bilion pemanjai 90km berengkah ari Lawas nengah Long Sukang disambung ngagai Long Lopeng lalu tembu ba Kampung Pa’Berunut Sarawak.
“Pakej kedua 160 km pemanjai berengkah ari Kampung Pa’Berunut ngagai Long Lama,” terang iya.
Baru mansutka jaku nya ba Pengawa Bejadi enggau Nyain Sempekat Pemereti Ai (MoU) sereta Pengawa Nyuaka Surat Setuju Nerima (SST) ngagai Serikat Perunding Kereja Nyukat Tanah ba Jalai Kampung Sebangang, ditu kemari.
