KUCHING: Malaysia kemari ngerikod kes baru positif Covid-19 pemadu tinggi pengudah ngerikod 287 kes baru.
Nitihka penerang ari Kaunsil Pengelikun Menua (MKN), semua kes positif nya ditemu berampit dalam menua.
Tiga nengeri ti ngerikod kes baru positif ke pemadu mayuh tu iya nya Sabah ngerikod 113 kes, Selangor (31 kes) enggau Kedah 129 kes).
Nengeri enggau kandang menua bukai ke bela bisi ngerikod kes baru positif kemari iya nya Terengganu enggau perak bela bisi tiga kes, Nengeri Sembilan enggau Kelantan bela dua kes, ditangkan Johor, Pahang, Labuan enggau Kuala Lumpur ngerikod siti kes.
Semua kes ke dirikod tu kes baru dalam menua, ukai kes import. Berebak enggau nya di Sarawak kemari nadai sebarang kes baru dirikod.
Ngelansa pekara ke sama mega MKN bisi madah, bisi 81 kes udah suman enggau dikemendar pansut ari sepital ngujungka bisi 10,095 pesakit ti udah suman enggau dikemendar pansut ari sepital naka kemari.
Nadai kes pemati baru diripot ngujungka kes pemati mengkang 136 kes.
Nya alai, jaga pengerai kita enggau diri sebilik ari kena rampit Covid-19 sereta titih Atur Tagang Penyuman (PKPP) ti udah ditetap.
Mensia mayuh mega dilalau seruran nitihka Atur Pengawa Standard (SOP) lebuh mindah ke bukai, ngena sengkabung mua, hand sanitizer, suah agi masu jari ngena sabun enggau nyaga takah.
Penerang silik tauka tanya bukai pasal PKPP tau telefon ngagai hotline ba lumur 03-88882010.
